Lavurs
Survegliaders e survegliadras da bartgas èn responsabels per il mantegniment da vehichels da l’aua sco bartgas a motor, navs a vela e bartgas da remblar. Els repareschan las paraids da la cuppa da la bartga e da la cumposiziun e dattan si in frestg vernisch u in vernisch da protecziun. Silsuenter vegnan las surfatschas pulidas e sigilladas e las bartgas vegnan equipadas cun nova ferradira ed autra tocca annexa.
Cun agid da las instrucziuns da diever repareschan e mantegnan survegliaders da bartgas ils motors, integreschan installaziuns electricas, monteschan instruments e mantegnan ils indrizs sanitars. Els surpiglian er lavurs da mantegniment vi da l’apparatura nautica che consista da las pitgas, las velas e las sugas.
Per tschertas lavurs da mantegniment e da reparatura ston las bartgas vegnir transportadas en il chantier e savens vegnan ellas er manadas sin la terra. Per transportar questas grondas chargias manevreschan survegliaders da bartgas a moda segira ils sistems da transport e d‘auzar. Cunquai ch’els possedan in permiss d’ir cun bartgas a motor ed a vela, pon els gist navigar las bartgas da lur plazza stabla.
Survegliaders da bartgas preparan las bartgas per la controlla uffiziala e guardan ch’els survegnian l’immatriculaziun necessaria. Ultra da quai èn els responsabels per il deposit d’enviern da las bartgas.
Tut tenor plazza da lavur surpiglian survegliaders da bartgas er autras lavurs. Per exempel emprestan e vendan els bartgas, dattan a fit plazzas stablas e deposits d’enviern u vendan carburants ed accessoris da bartgas.
Tar tut lur lavurs resguardan els las prescripziuns da protecziun da l’ambient e da la sanadad e sa tegnan vi da las mesiras da segirtad da lavur.
Scolaziun
Basa legala
Ordinaziun federala 6-8-2015 (versiun dals 1-1-2018)
Durada
4 onns
Furmaziun en la pratica
en chantiers
Furmaziun en scola
1 di per emna a la scola professiunala a Zofingen, Morges u Bellinzona
Roms professiunals
- exequir lavurs da mantegniment e da modificaziun dals indrizs tecnics da bartgas
- elavurar materials
- manevrar bartgas e manischar cun sistems da transport e d‘auzar
- exequir lavurs da planisaziun, da controlla e da mantegniment
Permiss dad ir cun bartga
Tar la scolaziun da basa tutga er l’acquist dal permiss d’ir cun bartga categoria A (bartgas a motor) e categoria D (navs a vela). Il manaschi da scolaziun surpiglia ils custs per mintgamai 10 lecziuns per l’instrucziun pratica.
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal professiunal "survegliader / survegliadra da bartgas AFQ"
Premissas
Furmaziun preliminara
- scola populara terminada
Pretensiuns
- inschign manual
- enclegientscha tecnica
- movibilitad corporala
- buna sanadad e constituziun robusta
- plaschair vi dal sport d’aua
Furmaziun supplementara
Curs
purschidas da l’Associaziun svizra dals constructurs da bartgas tar divers temas sco electrotecnica, cussegliaziun da clientella e vendita etc.
Furmaziun da basa scursanida
construider / construidra da bartgas AFQ
Examen professiunal superiur (EPS)
maister constructur da bartgas / maistra constructura da bartgas
A l’exteriur
cun scolaziun correspundenta vegnan purschids studis da las scolas autas spezialisadas en la Germania ed en l’Engalterra, p.ex. studi da Bachelor en construcziun da bartgas u tecnica da mar a las scolas autas spezialisadas da Bremen e da Kiel
Cundiziuns da lavur
Survegliaders da bartgas lavuran en chantiers pitschens u mesauns. Er la polizia da mar/lai e l’autoritad da duana dovran survegliaders da bartgas. Ulteriuras lavurs èn: scolast d’ir cun bartga a motor u a vela u ina funcziun sco expert dal donn tar ina assicuranza.
Tut tenor stagiun variescha il temp da lavur. Per regla lavuran construiders da bartgas il pli ditg la primavaira e l’atun.
Schegea che la branscha da construcziun da bartgas e survesaivla, datti per interessads avunda plazzas d’emprendissadi.
Ulteriuras infurmaziuns
Schweiz. Bootbauer-Verband
Bündtengasse 2
4800 Zofingen
Tel: 062 751 91 88
URL: www.traumberuf-bootbauer.ch
Revistas professiunalas:
URL: www.marina-online.ch