Mecanist / Mecanista da motos AFQ

Mecanists e mecanistas da motos segireschan l’admissiun da motos da tut gener al traffic, bartgettas, motos a trais rodas e quads a quatter rodas. Els passentan ina gronda part da lur temp da lavur en il lavuratori, nua ch’els exequeschan vi da las motos lavurs da mantegniment, reparaturas e midadas. Ultra da quai cusseglian els la clientella.

Mecanists da motos beneventan ils clients, prendan cunter las motos ed incumbensas da la clientella, cusseglian ed infurmeschan davart las lavurs en mira e custs. Els decleran ils avantatgs ed ils dischavantatgs da differents vehichels. Plinavant han els la survista da las lavurs ch’èn da liquidar, planiseschan ils pass da lavur ed il temp da lavur, uschia ch’els pon surdar a la clientella a termin ina moto senza menda.

Mecanists da motos elimineschan pannas da las motos e las preparan per l’admissiun al traffic. Els valiteschan e controlleschan roms e parts dal schassis sin donns effectuads tras isada u accidents. Els centreschan rodas, controlleschan profils da pneus, remplazzan pneus veders, nettegian rulleras dal chau dal guvernagl, controlleschan pedaleras ed axas ed unschan tut las parts moviblas.

Els reparan suspensiuns e parasquass e midan vi da las furtgas telescopicas l'ieli dals parasquass, rudellas da stuppadira e bischlas da guidar. Els controlleschan, dattan aria e moderniseschan ils frains cun e senza Sab (sistem antibloccant / tud: ABS). Els sa fatschentan cun la tracziun, la midada dals girs e cun l’electronica dals vehichels. Mecanists da motos examineschan e giusteschan chadainas sco er rodam ed accuplaments e reparan indrizs d’illuminaziun. Els chargian e remplazzan battarias, aviaders, indrizs d’envidament sco er tocs dal motor sco cilinders, carburaturs e ventils.

Mecanists da motos tschertgan cun apparats da mesirar e cun manuals suenter disturbis. Els examineschan per exempel il pilotadi electronic cun agid da multimeters (instruments che san mesirar pliras chaussas enina). Suenter che la lavur è terminada fan els in gir da prova.

Parts defectas vegnan per motivs da custs savens remplazzadas e betg reparadas. Mecanists da motos san dentant tuttina era resgiar, buglir u tagliar bain crennadiras, quai per reparar sezs tocs ch’els na survegnan betg pli. Els administreschan ultra da quai il magasin da tocs da reserva. Els resguardan las prescripziuns davart la garanzia da la qualitad, la segirezza da lavur, la protecziun da l’ambient e da la sanadad.