Lavurs
Construidras e construiders d'orglas sviluppeschan orglas e singuls elements da talas. Lieus da lavur èn baselgias, salas da concert, instituts da furmaziun e locals privats. La glieud da professiun montescha las parts da l'orgla e fa reparaturas dals instruments.
La construcziun d'ina orgla cumenza cun ina skizza. Sin fundament da quella dissegnan construiders d'orglas in plan da construcziun detaglià da l'instrument. Lura planiseschan els l'andament da la producziun e cumenzan a fabritgar las singulas parts da l'orgla: il portavent che reparta l'aria sin ils tschivlots, tocca pitschna per il register u singuls tschivlots da lain. Sco materials dovran els cunzunt lain e metal.
Las singulas parts monteschan las construidras d'orglas a differentas cumponentas da l'orgla e plazzeschan quellas en la chascha da l'orgla. Qua vegn medemamain duvrà current electric. En l'indriz da cumond da l'orgla vegnan installadas cumponentas electronicas. La segirezza ha en general auta prioritad en la construcziun d'orglas. Las lavurs han lieu savens en gronda autezza.
Construiders d'orglas èn er responsabels per il mantegniment dals indrizs existents da l'orgla. Els demonteschan l'instrument, schubregian, tractan la surfatscha e controllan, sch'el ha disturbis u mancanzas. Tals pon per exempel esser attatga d'insects, miffa u fils d'asbest, che pon sa chattar en elements da construcziun pli vegls.
Tar ils pensums da las construidras d'orglas tutgan er l'intunaziun da l'instrument, pia la realisaziun dal tun. Mintga tschivlot da l'orgla sto vegnir intunà ordavant separadamain. Tut tenor moda da construcziun vegnan ils tschivlots surlavurads spezialmain. Per intunar l'orgla ston ils construiders d'orglas giuditgar la cundiziuns climaticas dal local. Sco finiziun da la controlla sunan las construidras d'orglas l'instrument, giuditgeschan la disposiziun da sunar da l'orgla e fan las regulaziuns correspundentas. Ultra da quai analiseschan ellas – ensemen cun ils spezialists – la caracteristicas dal tun ed fan correcturas vid l'intunaziun, sch'i fa da basegn.
La cussegliaziun è ina part impurtanta da la lavur. Construiders d''orglas infurmeschan lur clientas e clients davart reparaturas pussaivlas, gidan a prender decisiuns e dattan scleriments davart la procedura futura.
Scolaziun
Basa legala
Ordinaziun federala dals 9-10-2019
Durada
4 onns
Furmaziun en la pratica
En in atelier u en in affar spezialisà per la construcziun d'instruments
Furmaziun en scola
Curs da bloc al center da furmaziun Arenenberg a Salenstein (TG) (instrucziun bilingua: tudestg e franzos)
Roms professiunals
- realisar incumbensas
- construir e reparar instruments da musica
- mantegnair e regular instruments da musica
- preparar ils instruments fin ch'els èn pronts per vegnir sunads
Curs ordaifer il manaschi
Emprender ed utilisar en la pratica la basa dal mastergn (curs da bloc al BBZA)
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "construider / construidra d'orglas AFQ"
Premissas
Furmaziun preliminara
- scola obligatorica terminada cun pretensius mesaunas u grondas
- instrucziun instrumentala d'orgla u d'in auter instrument è d'avantatg
Pretensiuns
- inschign manual
- imaginaziun dal spazi
Furmaziun supplementara
Curs
purschidas da scolas professiunalas e d'associaziuns professiunalas, p.ex. da la Cuminanza d'interess per construiders d'instruments da musica IGMIB u da la Societad svizra dals construiders d'orglas GSO
Scola auta spezialisada (SAS)
diplom federal da maister / maistra per construcziun d'instruments a Ludwigsburg (Germania)
studis en direcziuns spezialas parentadas, p.ex. creader diplomà/creadra diplomada en design da products (SAS)
Scola auta professiunala (SAP)
Studis en direcziuns spezialas parentadas, p.ex. Bachelor of Arts (SAP) en design da products e d'industria u Bachelor of Science (SAP) en Fine Arts
Cundiziuns da lavur
Construiders e construidras d'orglas lavuran en lavuratoris u al lieu tar il client. Savens èn els engaschads en baselgias. Il martgà da lavur è pitschen en Svizra, ma la dumonda da spezialists talentads è stabila. Var 10 manaschis da la construcziun d'orglas porschan plazzas d'emprendissadi sco construider d'orglas, en tscherts manaschis da la construcziun d'orglas sco er en in manaschi spezialisà datti la pussaivladad d'emprender a construir tschivlots d'orglas. Suenter plirs onns experientscha professiunala e cun l'engaschament necessari han spezialists la pussaivladad d'avrir in agen atelier.
Ulteriuras infurmaziuns
Cuminanza d'interess construiders d'instruments da musica
c/o Elin Office AG
Amthausgasse 3
3011 Berna
Tel: 031 313 20 00
URL: www.musikinstrumentenbauer.ch