Cheramists d’industria s’occupan da la producziun industriala da products da cheramica e da metal dir. En hallas da fabricaziun grondas mainan e surveglian els ils process da producziun. Latiers utiliseschan els indrizs da fabricaziun dirigids dal computer. Els lavuran en manaschis spezialisads en ina da las suandantas direcziuns da l’industria da cheramica: cheramica groppa, cheramica fina, cheramica da construcziun, cheramica tecnica, producziun da metals dirs u da models.

En manaschis spezialisads sin cheramica groppa produceschan cheramistas d’industria p.ex. quadrels, tievlas e sumegliants products. Sco material da basa utiliseschan ellas arschiglia che vegn tut tenor maschadada cun substanzas auxiliaras. Cun la materia prima tractada produceschan ellas en process automatisads ils tocs nunelavurads. Suenter che la tocca è sientada vegn ella brischada en lungs furns a tunnel.

En manaschis spezialisads sin cheramica fina produceschan cheramistas d’industria oravant tut artitgels sanitars sco lavabos e tualettas, vaschella, cheramica decorativa sco era plattinas da paraid e da fund. Il product cheramic cun glasura e cun surfatscha funcziunala ademplescha pretensiuns tecnicas, chemicas ed igienicas.

Cheramists d’industria spezialisads sin la cheramica da construcziun produceschan unicats sco serias da plattinas per pignas, cheminés, mobiglias che stgaudan sco era cheramica da construcziun per spazis dador e dadens. Els dattan furma a la massa da cheramica cun cular, smatgar e furmar a maun.

En manaschis spezialisads sin cheramica tecnica produceschan cheramists d’industria filters da particlas e catalisaturs per motors da diesel e da gas. Quels nettegian las svapurs dals motors da divers indrizs mobils e staziunars.

Cheramistas d’industria spezialisadas sin products da metal dir fabritgeschan metal dir or da las materias primas principalas carbid da volfram e cobalt sco er or dad auters supplements da liament. Ils champs d’applicaziun èn p.ex. l’industria d’automobils, l’aviatica e l’industria da maschinas.

En la construcziun da models vegnan producidas furmas per products cheramics. Cun agid da models da gip vegnan culadas las furmas da model che vegnan duvradas per la producziun industriala.

Cheramistas d’industria resguardan las prescripziuns legalas e dal manaschi areguard la segirezza, la sanadad e la protecziun da l’ambient. Uschia protegian ellas sasezzas, ils collavuraturs, il manaschi e l’ambient d’effects negativs.