![[object Object],[object Object]](https://media.sdbb.ch/transform/c82215fa-ab11-434f-acad-f12098596133/04_Gewebegestalter_FS-jpg?io=transform:fill,width:740,height:490)
Sco creadra u creader da textilias concepeschas e taissas ti tailas da fibras natiralas u da fibras artifizialas. Vi da talers produceschas ti tessì d'auta qualitad per vestgadira, accessoris e textilias d'abitar.
Incumbensas
- sviluppar products tenor ils giavischs da la clientella u tenor atgnas ideas, p.ex. tailas per vestgadira, accessoris u textilias d'abitar
- crear concepts per tessids spezials, objects d'art u costums
- elavurar sbozs al computer u sin palpiri e resguardar en quest connex las colurs ed ils trends da la moda e da la concepziun da l'interiur
- crear musters e testar en quest connex differentas colurs e tailas
- discutar concepts e musters cun la clientella
- calcular, quant temp e material che vegn duvrà e far in'offerta
- far dissegns tecnics, uschenumnadas patronas, che servan ad endrizzar il taler avant il process da taisser
- producir musters da colur e da qualitad directamain al taler
- calcular avant la procedura da taisser il tessì ed il material necessari sco er il dumber da fils
- taisser tailas vi da talers manuals e vi da talers che vegnan dirigids dal computer
- elavurar fibras natiralas sco launa, mangola, glin e saida sco er fibras artifizialas
- lavar tailas e tractar cun vapur, uschia ch'ellas na van betg en
- far tocs singuls e serias pitschnas
- preschentar products en l'atgna fatschenta u a fieras
Ambient da lavur
Sco creadra u creader da textilias lavuras ti suletta u sulet ubain en pitschens teams. Tias uras da lavur e tias cundiziuns da lavur pon esser differentas.
Ti lavuras en ateliers da taisser. La purschida da plazzas da lavur è pitschna. Ulteriuras pussaivladads d'engaschament chattas ti en l'industria da textilias, en ateliers terapeutics ed en singuls cas er en museums, nua ch'i vegnan restaurads tessids antics. Per ta far valair cun success en in martgà fitg pitschen, na stos ti betg mo resguardar ils basegns da la clientella, mabain er nizzegiar bain l'avantatg da producziuns individualas e da serias pitschnas per tai.
Pretensiuns e interess
- Senn per estetica
- Creativitad
- Talent da dissegnar
- Inschign manual
- Moda da lavurar conscienziusa ed exacta
- Lavurar cun ils mauns
- Dissegnar, decorar, crear
- Lavurar cun taila, tgirom e palpiri
Scolaziun
Furmaziun pratica en ina tessaria a maun: 3 fin 4 dis per emna
Curs da bloc da 6 emnas per onn a la scola professiunala spezialisada Scola industriala Val Müstair, Sta. Maria (GR)
En plirs chantuns: 5 dis durant 3 onns
3 onns
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Creader / Creadra da textilias AFQ
Furmaziun cuntinuonta
Curs
Curs da la federaziun Cuminanza d'interess taisser
Examen professiunal (EP)
- Spezialist / Spezialista da tecnologia textila EP
Examen professiunal superiur (EPS)
- Designer / Designra da fashion EPS
Scola spezialisada superiura (SSS)
- Tecnicist / Tecnicista da textilias e da vestgadira SSS
Scola auta spezialisada (SAS)
- Bachelor of arts en design
Tut tenor la scola auta spezialisada valan differentas cundiziuns d'admissiun.
Professiuns sumegliantas
