Start myBerufswahl

Interessen und Stärken - Schritt 1: Ich lerne meine Interessen und Stärken kennen

Berufe und Ausbildungen - Schritt 2: Ich lerne die Berufs- und Ausbildungswelt kennen

Stärken und Anforderungen - Schritt 3: Ich vergleiche meine Stärken mit den Anforderungen der Berufe und Ausbildungen, die mich interessieren

Schnuppern - Schritt 4: Ich schaue mir die interessanten Berufe genauer an

Überprüfen und entscheiden - Schritt 5: Ich überprüfe die möglichen Berufe oder Schulen und entscheide mich

Lehrstelle finden – Schule anmelden - Schritt 6: Ich setze meine Entscheidung um, suche eine Lehrstelle oder melde mich bei einer Schule an

Vorbereiten auf die Zukunft - Schritt 7: Ich bereite mich auf die Lehre oder die Mittelschule vor oder ich kläre ein Brückenangebot ab

Arbeitsmappe - Deine Ergebnisse

Einen Moment bitte...

myBerufswahl wird geladen.

Abgemeldet

Ihre Login-Session ist abgelaufen. Sie werden auf die Startseite weitergeleitet. Bitte melden Sie sich erneut an, um Ihr Login fortzusetzen.

Pictur / Pictura da vaider AFQ

Picturas e picturs sin vaider concepeschan, realiseschan e reparan picturas sin vaider e vitrificaziuns d’art. Lur professiun pretenda lavur manuala precisa e talent creativ. Els restaureschan era pictura sin vaider istorica.

Lavurs

Picturs sin vaider han ina professiun artisana e creativa. Els realiseschan vitraglias e vitrificaziuns d’art tradiziunalas e modernas. Tranter auter concepeschan e creeschan els era fanestras da baselgias. Tut tenor l’atelier nua ch’els èn emploiads variescha il focus da lur lavurs.

Picturas sin vaider transfurman lur ideas ed ils giavischs da la clientella en in product esteticamain attractiv. Ellas sviluppan plans da colurs ed ideas da creaziun ch’ellas visualiseschan cun agid da skizzas e da dissegns tecnics. Avant ch’ellas entschaivan cun la lavur effectiva discurran ellas cun la clientella davart ils dissegns. Sper las atgnas ideas da creaziun vegnan era realisadas skizzas dad artists. Qua è la lavur manuala precisa pli impurtanta ch’il flair creativ.

Per picturar sin vaider, l'uschenumnada vitraglia, lavuran picturs da vaider cun tecnicas tradiziunalas sco la pictura cun plumin, la cuvrida d’argient mellen, la cuvrida d’emagl u la serigrafia. Tar la pictura cun plumin vegn la colur brischada en il vaider. Per fixar durablamain la stresa da colur vegn il vaider brischà en il furn.

Per la vitrificaziun da plum vegnan cumbinads vaiders da colur en in maletg. Per colliar la singula tocca da vaider utiliseschan picturas sin vaider pertgas da plum ch’èn colliadas tras zin per lutegiar. Pli e pli vegnan er applitgadas novas tecnicas per producir vitrificaziuns d’art sco p.ex. luentar, dissegnar las parts e surcollar il vaider. In atelier sa spezialisescha mintgamai en tschertas tecnicas.

Picturs sin vaider èn era responsabels per la tgira, la conservaziun e la restauraziun da vitraglia istorica. En collavuraziun cun la Tgira da monuments procuran els per il mantegniment da bains culturals custaivels. Els documenteschan lur lavurs per che la posteritad las possia chapir.

Las picturas sin vaider resguardan las prescripziuns davart la segirezza da la lavur e davart la protecziun da la sanadad sco er davart la protecziun da l’ambient. Ellas observan en spezial las directivas davart l’utilisaziun d'acid idrofluroic, da plum e da colurs da vitraglia che cuntegnan plum.

Scolaziun

Basa legala

Ordinaziun federala 28-8-2009 (stadi dal 1-1-2018)

Durada

4 onns

Furmaziun en la pratica

En in atelier da vitraglia

Furmaziun en scola

1 di per emna a la scola professiunala a Berna

Roms professiunals

  • creaziun
  • elavuraziun dal vaider
  • mantegniment, conservaziun e restauraziun
  • segirezza da la lavur, protecziun da la sanadad e da l’ambient
  • Curs ordaifer il manaschi

    Emprender ed exercitar la basa professiunala en la pratica

    Maturitad professiunala

    Fitg bunas prestaziuns da scola permettan da frequentar la scola da maturitad professiunala durant la furmaziun da basa.

    Diplom

    Attestat federal da qualificaziun "pictur / pictura da vaider AFQ"

Premissas

Furmaziun preliminara
  • scola populara terminada cun pretensiuns mesaunas u autas
Pretensiuns
  • dun da dissegnar
  • buna imaginaziun spaziala
  • inschign manual
  • senn per furmas e colurs
  • creativitad
  • moda da lavur exacta
  • nagins disturbis da la vesida da colurs
  • interess per art e per istorgia

Furmaziun supplementara

Curs

purschidas da las scolas d’art applitgà

Scola spezialisada superiura (SSS)

scolaziun en secturs parentads, p.ex. creader (-dra) dipl. SSS design da products

Scola auta spezialisada (SAS)

studis en secturs parentads, p.ex. Bachelor of Arts (SAS) en conservaziun resp. Master of Arts (SAS) en conservaziun / restauraziun

A l’exteriur

scolas spezialisadas sin vitraglia en Germania, en Frantscha ed en Austria porschan furmaziuns supplementaras.

Cundiziuns da lavur

Cun experientscha professiunala da plirs onns han picturas e picturs sin vaider bunas premissas per fundar in agen atelier. In vast champ d'activitad e mobilitad areguard il lieu da lavur augmentan las schanzas d'avair success.

Suenter ina furmaziun supplementara correspundenta pon picturs sin vaider era lavurar sco magisters en scolas professiunalas u sco manaders da curs.

La purschida da plazzas d’emprendissadi è pitschna. Mo fitg paucs manaschis da pictura sin vaider scoleschan emprendists.

Ulteriuras infurmaziuns

Scola d'art applitgà Berna e Bienna
Schänzlihalde 31
3013 Berna
Tel: +31 337 03 37
URL: www.sfgb-b.ch

Associaziun svizra per vitraglia
Au Château
Chascha postala 225
1680 Romont FR
URL: www.glasmalerei-schweiz.ch




berufsberatung.ch