Zum Titel springen

Creader / Creadra da medias interactivas AFQ

Creaders e creadras da medias interactivas AFQ èn spezialists per la communicaziun moderna. Els sviluppan e realiseschan meds da communicaziun digitals ed interactivs. En emprima lingia ston quels esser simpels d'utilisar.

Lavurs

Els exequeschan suandantas lavurs:

Concepir e preparar projects
  • preparar projects cun cuntegns interactivs e digitals per agenturas online ed agenturas da web, redacziuns da radio, da televisiun e redacziuns online sco er ateliers grafics u partiziuns da communicaziun da grondas interpresas
  • planisar paginas-web, apps, forums socials, raits socialas e preschentaziuns POS sco per exempel l'interfatscha d’utilisader d’automats da bigliets
  • elavurar projects sin basa da las incumbensas cun creativitad ed enconuschientscha professiunala tecnica
  • resguardar tar la planisaziun differents formats dals displays cun ils quals las applicaziuns pon vegnir mussadas
  • tgirar in stretg barat tranter la clientella ed ils collavuraturs
  • elavurar ensemen cun autras persunas dal fatg il carnet da duairs, organisar il team da project, discutar variantas ed evaluar resultats
Realisar communicaziun interactiva e digitala
  • lavurar durant il svilup e la realisaziun dals meds da communicaziun cun maletgs statics ed animads, cun texts ed infograficas sco era cun datotecas d’audio, da video e da 3D
  • integrar differents elements en lur project, terminar funcziuns e specifitgar interacziuns
  • realisar cun agid da tecnicas manualas e da la hardware e software correspundenta las medias tenor concept.
  • examinar e publitgar ils meds da communicaziun interactivs e digitals, sco per exempel ina pagina-web u in'app sin sistems da communicaziun digitals sco smartphones, tablets, computers
  • guardar ch'ils sistems pon vegnir nizzegiads a moda simpla e facila

Scolaziun

Durada

4 onns

Furmaziun en la pratica

En in manaschi d'emprendissadi (p.ex. agentura da reclama, redacziun da radio/tv/online, atelier da grafica, partiziun da communicaziun)

Furmaziun en scola

A la scola professiunala a Basilea, Berna, Son Gagl: 2 dis l'emna en il 1./2. onn d’emprendissadi, 1 di l'emna en il 3./4. onn d’emprendissadi

Roms professiunals

  • preparar projects cun cuntegns digitals interactivs
  • sviluppar concepts per medias digitalas interactivas
  • crear il design per meds da communicaziun interactivs e digitals (incl. englais dal rom)
  • applitgar l'englais dal rom
  • Curs ordaifer il manaschi

    Emprender ed exercitar a moda pratica la basa professiunala (5 curs a 4 dis)

    Maturitad professiunala

    Fitg bunas prestaziuns da scola permettan da frequentar la scola da maturitad professiunala durant la furmaziun da basa.

    Scola a temp cumplain

    Scolas a Friburg, Genevra, Losanna e La Chaux-de- Fonds e Lugano porschan la furmaziun da basa sco scola a temp cumplain.

    Diplom

    Attestat federal da qualificaziun "creader / creadra da medias interactivas AFQ"

Premissas

Furmaziun preliminara
  • temp da scola obligatoric terminà
  • test da qualificaziun: I vegn examinà la chapientscha da leger, grammatica tudestga, quints a chau ed a scrit, geometria, il pensar logic sco era la cumpetenza da memorisar. Il test da qualificaziun vegn fatgs en in manaschi da l'industria grafica. Per regla vegn el fatgs en connex cun il fufragnadi e maina tar in certificat.
Pretensiuns
  • sentiment per furmas e colurs
  • buna imaginaziun spaziala
  • encletga tecnica
  • flexibladad intellectuala
  • bun dun da communicaziun e bunas enconuschientschas da linguas
  • buna savida generala
  • abilitad da lavurar en in team
  • test da qualificaziun: I vegn examinà la chapientscha da leger, grammatica tudestga e franzosa, quints a chau ed a scrit, geometria, il pensar logic sco era la cumpetenza da memorisar. Sch’il test vegn fatg cun success, vegn surdà in certificat. Uschia èsi pussaivel da s’annunziar per in fufragnadi. I vegn cusseglià d’agiuntar quest certificat als documents d’annunzia.
  • Test da qualificaziun:
    Fin ch’il test per creaders da medias interactivas è disponibel, vegn recumandà als interessents d’absolver il test da classificaziun per poligrafs.

Furmaziun supplementara

Curs

purschidas da scolas professiunalas, scolas d’art sco era d’organisaziuns dal mund da lavur.

Examen professiunal (EP)

cun certificat professiunal federal: p.ex. tipograf / tipografa per la communicaziun visuala

Examen professiunal superiur (EPS)

p.ex. managera da publicaziun cun diplom federal u designer grafic cun diplom federal

Scola spezialisada superiura (SSS)

creader grafic / creadra grafica dipl. SSS design da communicaziun

Scola auta spezialisada (SAS)

studis el champ da design, p.ex. Bachelor of Arts (SAS) en communicaziun visuala. Tut tenor scola auta spezialisada valan differentas cundiziuns d'admissiun.

Cundiziuns da lavur

Creaders da medias interactivas lavuran en agenturas online ed agenturas da web, redacziuns da radio, da televisiun e redacziuns online, ateliers grafics u partiziuns da communicaziun da grondas interpresas.

Ulteriuras infurmaziuns

SIMD Swiss Interactive Media Design
Speichergasse 35
Chascha postala 678
3000 Berna 7
Tel: +41 58 225 55 66
URL: www.simd.ch

Scola d'art applitgà Basilea
4005 Basilea
Tel: +41 61 695 67 70
URL: www.sfgbasel.ch

Scola d'art applitgà Berna e Bienna
3013 Berna
Tel: +41 31 337 03 37
URL: www.sfgb-b.ch

Scola d'art applitgà Son Gagl
9012 Son Gagl
Tel: +41 58 228 26 79
URL: www.gbssg.ch



berufsberatung.ch