Lavurs
Spezialists e spezialistas da restauraziun lavuran en restaurants u en differents secturs da restauraziun d’in hotel. Els cuvran las maisas e las decoreschan adequat a l’eveniment. Avant l’arriv dals giasts controlleschan els schebain ils magiels, la porcellana, la pusada ed ils stgaudaplattas èn nets e las serviettas bain drappadas.
Spezialists da restauraziun salidan ils giasts curtaschaivlamain ed als accumpognan tar la maisa reservada u elegida. Els enconuschan las purschidas da lur manaschi e cusseglian ils visitaders a moda cumpetenta pertutgant la schelta e la cumposiziun da las spaisas. Enconuschientschas detagliadas davart victualias, vins e spirituosas als pussibiliteschan da cussegliar in vin adattà u autras bavrondas che van a prà tar la tschavera. Sco punct culminant porschan els als giasts desserts e bunas sorts da chaschiel.
Spezialists da restauraziun san tagliar charn e pesch a moda professiunala. Els observan attentamain ils giasts e decidan schebain in discurs amiaivel è cunvegnent e giavischà u sch’ils giasts prefereschan in service discret. Suenter la tschavera preparan els il quint en la valuta dal pajais u quintan enturn la summa en ina valuta estra. Lura incassan els la summa en bar u cun carta.
Ulteriuras incumbensas surpiglian spezialists da restauraziun davos las culissas. Spaisas simplas san els tenor basegn er preparar sezs. Els tgiran e nettegian ils indrizs, las maschinas ed ils apparats dal sectur da restauraziun a moda conscienziusa. Er la controlla da la rauba pretenda ina buna survista. Tar la magasinaziun resguardan els las perscripziuns d’igiena e controlleschan schebain la rauba è deponida en il dretg lieu e cun la dretga temperatura.
Spezialists da restauraziun han ina buna demananza, èn flexibels ed èn abels da supportar squitsch. Grazia a lur persunalitad carismatica e lur talent da communitgar chapeschan els da s’occupar da giasts difficils a moda correcta e da reagir sin reclamaziuns a moda adequata. Perfin en situaziuns hecticas na perdan els betg ils detagls ord vista.
Scolaziun
Basa legala
Ordinaziun federala 7-12-2004
Durada
3 onns
Furmaziun en la pratica
En in restaurant, hotel u manaschi da la gastronomia collectiva
Furmaziun en scola
Tut tenor chantun different: 1 di per emna a la scola professiunala / 2 curs professiunals interchantunals (mintgamai 5 emnas) per onn en in hotel da scola da hotelleriesuisse
Roms professiunals
- economia da manaschi / organisaziun da manaschi
- igiena / segirezza da la lavur / protecziun da la sanadad
- logistica
- accumpagnament dals giasts / cumportament
- vendita / distribuziun da spaisas e bavrondas
- producziun / enconuschientschas da victualias e bavrondas
- mantegniment da la valur
- segunda lingua
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "Spezialist / spezialista da restauraziun AFQ"
Premissas
Furmaziun preliminara
- scola populara terminada
Pretensiuns
- plaschair vi dal contact cun giasts
- cumparsa cultivada e buna demananza
- prontadad da servetschs
- buna memoria
- bun dun receptiv
- spiert da gruppa
- flexibilitad ed abilitad da supportar squitsch
- talent d’organisaziun
- enconuschientschas da linguas estras
- conscienza d’igiena
- bun gust e bun nas
- buna sanadad
Furmaziun supplementara
Curs
purschidas da las associaziuns professiunalas
Furmaziun da basa scursanida
cuschinier / cuschiniera AFQ, spezialist / spezialista d’hotellaria AFQ
Curs spezialisà
management dal front office (hotelleriesuisse)
Examen professiunal (EP)
cun certificat federal:
manader / manadra da sectur restauraziun, manader / manadra da gestiun gastro, manader / manadra da sectur hotellaria economia da chasa, schef / scheffa da recepziun
Examen professiunal superiur (EPS)
manader / manadra dipl. restauraziun, manader / manadra dipl. gastronomia collectiva, manader / manadra dipl. hotellaria-economia da chasa, interprendider / interprendidra dipl. gastro euv.
Scola spezialisada superiura (SSS)
p.ex. hotelier / hoteliera dipl. restauratur / restauratura dipl. (SSS)
Scola auta spezialisada (SAS)
Bachelor of Science (SAS) en International Hospitality Management, Bachelor of Science (SAS) en turissem euv.
Cundiziuns da lavur
Spezialists da restauraziun lavuran en restaurants, en hotels u en ils manaschis da la gastronomia sistematica e gastronomia da cuminanza (restaurants da persunal). Il temp da lavur è irregular e po durar enfin tard la saira. Dumengias e firads èn dis da lavur spezialmain intensivs.
La bursa da fufragnadis e d’emprendissadis da la branscha www.berufehotelgastro.ch gida interessads ed interessadas tar la tschertga suenter purschidas en tut las regiuns linguisticas da la Svizra.
Spezialists da restauraziun cun enconuschientschas da linguas estras e pratica professiunala èn tschertgads ed han cun la furmaziun supplementara correspundenta bunas schanzas sin plazzas da lavur en il cader.
Ulteriuras infurmaziuns
GastroSuisse
Verband für Hotellerie und Restauration
Blumenfeldstr. 20
8046 Zürich
Tel: 0848 377 111
URL: www.berufehotelgastro.ch
Hotelleriesuisse
Marketing & Verkauf Bildung
Monbijoustr. 130
3001 Bern
Tel: 031 370 42 83
URL: www.berufehotelgastro.ch