Vernischadra industriala AFQ
Vernischader industrial AFQ
Correspunda questa professiun a mai?![[object Object],[object Object]](https://media.sdbb.ch/transform/2ec39305-1d95-4ae5-8985-0bf9d1f30123/Industrlackierer-OM-138-JPG?io=transform:fill,width:740,height:490)
1. onn d’emprendissadi: CHF 750–850.–
2. onn d’emprendissadi: CHF 900–1000.–
3. onn d’emprendissadi: CHF 1100–1300.–
Vernischadras industrialas e vernischaders industrials dattan si differentas stresas da colur u da vernisch sin maschinas, apparats, objects ch'èn per exempel ord metal, materia sintetica, lain, vaider, palpiri u textilias. Questas vernischs u colurs duain embellir ils objects e materials ubain als proteger cunter corrusiun, ruina, umiditad, sal ubain auters donns.
Incumbensas
- manar discurs cun la clientella ed eruir lur basegns, p.ex. co ch'ina mobiglia duai vegnir vernischada
- calcular ils materials ed il temp da lavur ch'èn necessaris per far las lavurs
- far plans da lavur per las incumbensas
- installar las blatgas, ils indrizs u ils palancads ch'i dovra per far il vernischadi
- preparar ed eventualmain maschadar la quantitad da colur ch'i dovra
- cuvrir secturs e parts che ston vegnir protegids
- allontanar stresas da colur u liadiras veglias e nettegiar tschertas parts
- far tractaments preliminars, p.ex. sgrassar, far davent la ruina, glimar u barschunar tschertas parts
- dar si ina vernisch da basa u ina protecziun cunter corrusiun
- dar si en moda differenta colurs e vernischs, p.ex. cun sprizzar, bagnar, proceduras electricas u cun in barschun
- sientar objects vernischads en in furn u tunnel
- controllar la qualitad da la lavur e sche necessari far meglieraziuns
- mantegnair, tgirar e nettegiar utensils, apparats ed indrizs
- dismetter correctamain ruments, sche pussaivel reciclar
- controllar regularmain, sche las maschinas ed ils indrizs funcziunan
- identifitgar ed eliminar disturbis
Ambient da lavur
Vernischadras industrialas e vernischaders industrials elavuran las surfatschas da products industrials, per exempel da lain, da metal, da materia sintetica u da vaider. Vernischadras industrialas e vernischaders industrials vegnan en contact cun substanzas nuschaivlas e toxicas e portan perquai mascrinas da protecziun, egliers e guants. Ellas ed els lavuran en lavuratoris. Lur temps da lavur èn regulars.
Vernischadras industrialas e vernischaders industrials lavuran en interpresas da vernischadi e da liadiras ubain en partiziuns da vernischadi da manaschis industrials. Las perspectivas professiunalas sin il martgà da lavur èn bunas.
Pretensiuns e interess
- Inschign manual
- Nagins disturbis da vesair colurs
- Moda da lavurar conscienziusa ed exacta
- Senn per estetica
- Moda da lavurar sistematica
- Senn per igiena e per nettezza
- Resistenza corporala
- Savair supportar odurs dischagreablas
- Lavurar cun ils mauns
- Elavurar metal
- Lavurar en moda exacta
Scolaziun
En in manaschi da vernischadi e da liadiras ubain en ina partiziun da vernischadi d'in manaschi industrial
1 di per emna en la scola professiunala spezialisada
Emprender, approfundar ed exercitar las basas professiunalas, 24 dis durant 3 onns
3 onns
Terminà la scola obligatorica
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Vernischader industrial / Vernischadra industriala AFQ
Furmaziun cuntinuonta
Curs
Purschidas da las scolas professiunalas spezialisadas e da las scolas spezialisadas sco er da l'Associaziun svizra dals maisters vernischaders industrials ASMVI (www.svilm.ch)
Examen professiunal (EP)
P.ex. Spezialist / Spezialista da vernischadi industrial cun attestat professiunal federal
Examen professiunal superiur (EPS)
P.ex. Directur / Directura da producziun industriala cun diplom federal
Furmaziun supplementara a l'exteriur
Tecnicist / Tecnicista da vernischadi cun diplom statal en ina scola spezialisada per colur e furmaziun da la Germania, fachschulen-farbe.de
Scola auta spezialisada (SAS)
Studis en secturs parentads, p.ex. bachelor of arts en design d'objects u master of arts en design industrial
Professiuns sumegliantas
