1. onn d’emprendissadi: CHF 500.–
2. onn d’emprendissadi: CHF 800.–
3. onn d’emprendissadi: CHF 1000.–
4. onn d’emprendissadi: CHF 1200.–
Tecnicistas e tecnicists da dents fan – tenor las instrucziuns da dentistas – protesas ed apparaturas ortodonticas, sco curunas, punts e protesas per remplazzar dents mancants u per curreger anomalias da la missella. Ellas ed els èn er cumpetents per far adattaziuns e reparaturas e procuran che las protesas e las apparaturas sajan esteticas, funcziunablas e confortablas.
Incumbensas
- preparar – a maun dals maletgs, ch'il dentist ha fatg cun il scanner da la bucca – in model da gip u in squitsch 3D da la missella
- reciclar u dismetter ruments tenor las prescripziuns davart l'ambient
- modellar curunas u punts or da tschaira u las crear cun la software CAD, pia al computer, quai tenor il model da gip u da plastic
- inserir las curunas e las punts modelladas en materia resistenta al fieu e las cular, adattar e pulir cun liaments da metals prezius u betg prezius, suenter che la tschaira è arsa ora
- fresar – or da cheramica u or d'oxid da metal cun maschinas che vegnan regladas per computer – curunas e punts ch'èn vegnidas preparadas cun agid da la software CAD
- dar si cheramica sin la curuna e l'arder per furmar in dent
- mular las surfatschas
- far attenziun tar la cheramica, che la colur dal dent artifizial correspundia a la colur dals dents da la pazienta
- tscherner ensemen cun il pazient e la dentista la furma e la colur da la protesa
- montar ed adattar models en in articulatur, pia en in apparat che imitescha ils moviments da la missella
- preparar ina construcziun da metal e modellar vidlonder ils dents artifizials per laschar empruvar il pazient
- far protesas cumplettas per persunas senza dents
- assister il dentist tar l'emprova da la protesa e far las adattaziuns ch'i dovra
- producir apparaturas ortodonticas cun fildaroms storts e struvas e controllar, sch'ellas funcziunan
- far fermagls da plastic, tagliar e pulir ils urs u crear ils fermagls cun software CAD ed als stampar en 3D
Ambient da lavur
Tecnicistas e tecnicists da dents lavuran sulets u en pitschens teams en labors dentals, praticas da dentist, clinicas dentalas sco er en l'industria dentala. A maun e cun programs da computer fabritgeschan ellas ed els tocs singuls sin mesira. Ellas ed els collavuran stretgamain cun dentistas e dentists. Ellas ed els portan vestgadira da protecziun e durant tschertas activitads er egliers da protecziun. Lur temps da lavur èn regulars.
En gronds labors dentals pon ellas ed els sa spezialisar per in tschert champ, per exempel cheramica, ortopedia da la missella u cular models. Cun l'experientscha correspundenta pon ellas ed els er surpigliar posiziuns da gronda responsabladad. Igl è er pussaivel da fundar in'atgna firma. Quai pretenda dentant grondas investiziuns. Per tegnair pass cun il svilup tecnologic, absolva la glieud da professiun cuntinuadamain furmaziuns supplementaras.
Pretensiuns e interess
- Inschign manual
- Moda da lavurar conscienziusa ed exacta
- Moda da lavurar independenta
- Buna vesida
- Nagins disturbis da vesair colurs
- Dun d'observar
- Senn per estetica
- Senn per igiena e per nettezza
- Lavurar en moda exacta
- Lavurar cun ils mauns
- Schliar incumbensas tecnicas
Scolaziun
En in labor dental
1 di per emna en la scola professiunala spezialisada
Emprender la lavur pratica, approfundar ed exercitar las basas professiunalas, 33 dis durant 4 onns
4 onns
Terminà la scola obligatorica
Swiss Dental Laboratories porscha in test da qualificaziun e recumonda d'absolver in fufragnadi.
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun da basa.
Tecnicist / Tecnicista da dents AFQ
Furmaziun cuntinuonta
Curs
Purschidas da federaziuns professiunalas, da firmas dentalas e d'instituts da tecnica dentala en universitads
Examen professiunal (EP)
Tecnicist da dents spezialisà / Tecnicista da dents spezialisada en ortopedia da la missella cun attestat professiunal federal
Professiuns sumegliantas
