Ortopedista AFQ
Ortopedist AFQ
![[object Object],[object Object]](https://media.sdbb.ch/transform/4730504a-423e-4976-9f91-2557876a1492/Orthopaedistin-DW-132?io=transform:fill,width:740,height:490)
Ortopedistas ed ortopedists fan meds d’agid per umans cun abilitads restrenschidas da chaminar, da star en pe u da seser per levgiar lur mintgadi. Els fan protesas, ortesas e meds da reabilitaziun ed infurmeschan davart lur diever.
Incumbensas
- cussegliar persunas ch'èn restrenschidas en lur libertad da sa mover tras malsognas, accidents u mendas da naschientscha
- sclerir ensemen cun il medi, il fisioterapeut, ils purtaders dals custs e cun il client tge med d’agid ch'è adattà: protesas remplazzan in member mancant u in member che na funcziuna betg pli uschè bain; ortesas èn stgainas, corsets u solas ortopedicas che sustegnan e curregian la posiziun dal corp; meds da reabilitaziun pon sustegnair il dies da persunas en sutgas cun rodas sco era la posiziun da seser u da giaschair durant la notg
- cussegliar la clientella cun empatia ed enconuschientschas da l'anatomia e da la patologia co ch'ils meds d’agid pon simplifitgar lur mintgadi
- planisar, producir e documentar mintga protesa, ortesa u mintga med da reabilitaziun a moda individuala
- exequir lavur artisanala da precisiun
- duvrar differents metals, lain, materia sintetica, gip, tgirom e materials da pulstrada
- elavurar ils materials cun differentas maschinas e guaffens; navend da la maschina da cuser fin al scanner da computer
- pussibilitar als clients da purtar a moda agreabla e segira la protesa u l’ortesa cun lavurar precis e cun quità
- crear cun agid dals novs svilups tecnics agids da seser, da chaminar e da star en pe adina pli estetics e natirals
- adattar protesas, ortesas e meds da reabilitaziun als basegns individuals
- adattar u midar pliras giadas il cundriz durant la fasa da reabilitaziun fin ch’el correspunda optimalmain als basegns dal client
- far reparaturas dals meds d’agid ortopedics
Ambient da lavur
Ortopedists ed ortopedistas lavuran en ateliers ortopedics da clinicas e centers da reabilitaziun. Els lavuran savens sur sasez u en teams pitschens. Il contact cun la clientella e cun las medias e fisioterapeuts è impurtant.
La purschida da plazzas d’emprendissadi è plitost pitschna. La professiun pretenda per quest motiv ina tscherta flexibilitad en connex cun il lieu da lavur.
Spezialists cun ina buna scolaziun èn tschertgads en Svizra ed a l’exteriur. Per incumbensa d’organisaziuns d’agid internaziunalas pon els per exempel era far servetschs a l’exteriur en territoris da guerra e da crisas.
Cun ina furmaziun supplementara correspundenta èsi pussaivel da lavurar en ina posiziun da cader en in atelier ortopedic, da surpigliar ina lavur sco manader da filiala d’in affar da vendita per meds d’agid ortopedics u da lavurar independentamain.
Pretensiuns e interess
- Inschign manual
- Abilitad da s'adattar a novas tecnologias
- Imaginaziun tridimensiunala
- Empatia
- Discreziun
- Dun d'observar
- Senn per estetica
- Schliar incumbensas tecnicas
- Lavurar en moda exacta
- Avair contact cun persunas
Scolaziun
En in lavuratori ortopedic
1 di l'emna a la scola professiunala a Turitg u Losanna
Emprender ed exercitar la basa professiunala (16-20 dis durant 4 onns)
4 onns
Temp da scola obligatoric terminà
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Ortopedist / Ortopedista AFQ
Furmaziun cuntinuonta
Curs
Purschidas da l’Associaziun svizra dals tecnicists d'ortopedia (ASTO) sco era purschidas da scolas professiunalas spezialisads u scolas superiuras spezialisadas
A l'exteriur
Purschidas da la Scola spezialisada per tecnica d'ortopedia a Dortmund, Germania
Examen professiunal (EP)
Spezialist / spezialista per tecnica da reabilitaziun cun certificat professiunal federal
Examen professiunal superiur (EPS)
Ortopedista dipl., experta reabilitaziun per umans impedids da vesida e tschorvs
Professiuns sumegliantas
