![[object Object],[object Object]](https://media.sdbb.ch/transform/dce2334f-39c4-4fa6-84ac-743bf8809d34/13_Feinwerkoptikerin_SL-jpg?io=transform:fill,width:740,height:490)
1. onn d’emprendissadi: CHF 450–700.–
2. onn d’emprendissadi: CHF 730–900.–
3. onn d’emprendissadi: CHF 930–1100.–
4. onn d’emprendissadi: CHF 940–1400.–
Opticras ed optichers da precisiun fabritgeschan cun agid da dissegns tecnics elements da construcziun optics e mecanics per apparats optics. Els manevreschan maschinas da fabricaziun e monteschan la tocca tar gruppas da construcziun.
Incumbensas
- fabritgar tocca da construcziun per l'optica en vaider, sco lentas, spievels e prismas per secturs da l’optica dals egls, da la tecnica medicinala, da la tecnica da fotografia e film u da la tecnica da mesiraziun
- construir products fitg precis en differentas dimensiuns; da lentas microscopicas fin a spievels per l'astronomia da plirs meters
- producir surfatschas planivas e surfatschas sfericas (cun arvieut) tras gizzar u pulir
- pulir e nettegiar en lavur a maun ils products
- nobilisar ils products da vaider, surtrair las surfatschas cun stresas finas da metal, fluorid da magnesium u oxids per pudair influenzar la reflexiun da la glisch
- preparar il material, ils guaffens sco era la materia auxiliara ed endrizzar las maschinas per la producziun
- fabritgar la tocca da construcziun tenor ina descripziun da l'incumbensa e tenor dissegns tecnics
- fabritgar simpla tocca mecanica ord differents materials
- colliar las lentas u ils prismas cun agid da chit fin tar uschenumnads sistems optics
- controllar la qualitad cun metodas da mesiraziun ed examinaziun
- lavurar ensemen cun autras persunas spezialisadas durant il cumplain process da fabricaziun
Ambient da lavur
Optichers da precisiun chattan plazzas da lavur en manaschis da la construcziun tecnica d’instruments e d'apparats. Els pon lavurar en il sectur da la producziun, da la montascha, dal svilup, da la construcziun, dal biro tecnic u dal lavuratori da controlla.
Optichers da precisiun han bunas schanzas sin il martgà da lavur. Els disponan da fitg bunas enconuschientschas da basa en mecanica ed optica e pon vegnir duvrads en differents champs.
Pretensiuns e interess
- Chapientscha tecnica
- Inschign manual
- Buna vesida
- Moda da lavurar conscienziusa ed exacta
- Imaginaziun tridimensiunala
- Abilitad da sa concentrar
- Resistenza corporala
- Planisar, construir, far dissegn tecnic
- Lavurar cun maschinas
- Lavurar cun arschiglia, crap e vaider
Scolaziun
En in manaschi da l’industria optica, cumplettà cun ina furmaziun en lavuratoris d’emprendissadi (basas da l'optica, mecanica ed electronica)
1 di l'emna a la scola professiunala a Rorschach (roms specifics a la professiun vegnan er instruids da manaschis d’emprendissadi)
Emprender ed exercitar a moda pratica la basa professiunala
4 onns
Temp da scola obligatoric terminà
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Opticher / Opticra da precisiun AFQ
Furmaziun cuntinuonta
Curs
Purschidas da scolas professiunalas e scolas spezialisadas
Examen professiunal (EP)
Cun certificat professiunal federal: spezialist / spezialista da process, commerziant tecnic / commerzianta tecnica
Examen professiunal superiur (EPS)
Maister / maistra d’industria
Scola spezialisada superiura (SSS)
Curs da furmaziun en direcziuns spezialisadas parentadas, p.ex. tecnicist diplomà / tecnicista diplomada construcziun da maschinas, tecnicist diplomà / tecnicista diplomada tecnica da sistems, tecnicist diplomà / tecnicista diplomada process d’interpresas
Scola auta spezialisada (SAS)
Roms da studi en direcziuns spezialisadas parentadas, p.ex. Bachelor of Science (SAS) en microtecnica, Bachelor of Science (SAS) en mecatronica, Bachelor of Science (SAS) en tecnica da sistems, Bachelor of Science (SAS) en tecnica da maschinas. Tut tenor scola auta spezialisada valan differentas cundiziuns da lavur.
Professiuns sumegliantas
