![[object Object],[object Object]](https://media.sdbb.ch/transform/a67cabb7-10eb-4a13-b109-14317fd9df57/Fleuriste-JH-023-jpg?io=transform:fill,width:740,height:490)
1. onn d’emprendissadi: CHF 660.–
2. onn d’emprendissadi: CHF 810.–
3. onn d’emprendissadi: CHF 1010.–
Fluristas e flurists lavuran en affars da flurs u en centers d’orticultura. Cun flurs e cun autras plantas fan els matgs, arranschaments e tschupels. En l’affar cusseglian els la clientella. Ordaifer creeschan els emplantaziuns e decoraziuns.
Incumbensas
- far matgs, arranschaments e tschupels cun flurs da tagl, plantas verdas, puschas e pumaraida ed ornar quels cun bindels e figuras da decoraziun
- far arranschaments stagiunals per Pasca, Nadal, Son Valentin u a chaschun dal di da la mamma
- resguardar ils giavischs da la clientella
- far ornaments da flurs per nozzas, anniversaris u sepulturas
- ornar salas da festa e baselgias
- preschentar ils matgs e las plantas verdas a moda e maniera attractiva en stizun da flurs
- decorar la vitrina e las stanzas
- nettegiar vasas e regals, dustar ils ruments e scuar il palantschieu
- dar aua e tgirar las plantas
- reciclar e dismetter il rument a moda correcta
- prender encunter empustaziuns per telefon ed e-mail
- emplenir scrits da furniziun e quittanzas
- furnir sez ils matgs u incumbensar il servetsch da furniziun
Ambient da lavur
Flurists lavuran sco emploiads u sur sasezs en affars da flurs, p. p. era en centers d’orticultura u tar distribuiders a l’engrossa.
Il temp da lavur sa drizza tenor ils temps d’avertura dals affars. Avant firads èsi spezialmain hectic. Flurists ston lura savens far sururas. Els pon lavurar en temp cumplain u parzial. I dat era relaziuns d’engaschament stagiunalas.
Flurists lavuran savens en localitads fraidas ed umidas. En la lavur dal mintgadi stattan els savens sin pe e ston per il solit purtar chaussas grevas sco vaschs, chistas e sadellas.
Pretensiuns e interess
- Creativitad
- Senn per estetica
- Inschign manual
- Moda da lavurar independenta
- Nagins disturbis da vesair colurs
- Resistenza corporala
- Plaschair da vender e da cussegliar
- Lavurar cun ils mauns
- Dissegnar, decorar, crear
- Avair contact cun persunas
- Lavurar cun plantas
Scolaziun
En in affar da flurs u tar in distribuider a l’engrossa
1 di per emna a la scola professiunala
Emprender ed exercitar a moda pratica la basa professiunala
Kantonale Gartenbauschule Oeschberg (3 onns) u Floristenschule Lullier (3 onns per franzos): scolaziun teoretica e pratica en scola, praticums en affars da flurs; pussaivladad d’abitar en l’internat
3 onns
Temp da scola obligatoric terminà
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Flurist / Flurista AFQ
Furmaziun cuntinuonta
Curs
Purschidas dal Schweizerischer Floristenverband, da scolas professiunalas u da purschiders privats
Examen professiunal (EP)
Flurist / flurista cun certificat professiunal federal
Examen professiunal superiur (EPS)
Maistra flurista dipl.
Scola spezialisada superiura
P. ex. tecnicist dipl. SSS
Surveglianza da construcziun cun approfundaziun en construcziun d’orticultura e cuntrada
Scola auta spezialisada
En il champ professiunal natira: p. ex. Bachelor of Science (SAS) en inschigneria da l’ambient, en agronomia, en architectura da cuntrada, en il champ professiunal furmaziun creativa: p. ex. Bachelor of Arts (SAS) en architectura interna u en design da products ed industria
Professiuns sumegliantas
