Assistenta per il mantegniment d'autos AFP
Assistent per il mantegniment d'autos AFP
![[object Object],[object Object]](https://media.sdbb.ch/transform/9d3d6657-4aed-4a3f-887a-d1fd435693cb/automobilassistent_a_t_4486?io=transform:fill,width:740,height:490)
1. onn d’emprendissadi: CHF 600.–
2. onn d’emprendissadi: CHF 750.–
Sco assistenta u assistent per il mantegniment d'autos fas ti simplas lavurs da mantegniment e da reparatura da vehichels, p.ex. vi da las rodas, ils paraculps u l'illuminaziun. Ti remplazzas parts tenor las instrucziuns d'ina persuna superiura. Ti collavuras cun spezialistas e spezialists d'autos e cun mecatronistas e mecatronists d'automobils.
Incumbensas
- controllar ed emplenir liquids dals sistems dad ieli, da sfradentar e da franar
- examinar il stadi dals pneus, las rodas, la suspensiun da las rodas, ils paraculps ed il guvernagl
- controllar e mantegnair las battarias
- montar e demontar generaturs ed aviaders tenor las instrucziuns
- nettegiar il motor, il schassis, la carossaria e l'interiur dal vehichel
- controllar l'illuminaziun ed ils sbrinzladers sco er installar ulteriuras bischlas da contact vi da chars annexs
- exequir las lavurs vi da cumponentas dal sistem d'ieli, da sfradentar u da franar tenor las instrucziuns
- remplazzar las rodas, ils pneus ed ils ventils
- gidar a demontar ed a montar il mecanissem, l'accuplament, l'alver da tracziun u il guvernagl
- remplazzar parts isadas dal sistem da franar, p.ex. solas dal frain
- reparar u remplazzar las cumponentas da l'indriz da svapur sut instrucziun d'ina persuna spezialisada
- tschertgar numers da tocs da reserva en il document dal vehichel, empustar tocs da reserva e preparar quels al lavuratori
- controllar, sche tut las lavurs dumandadas èn vegnidas fatgas en moda correcta
- documentar en in rapport las lavurs exequidas e las parts da reserva duvradas
- dismetter ils ruments en moda ecologica
- mantegnair simplas maschinas ed utensils dal lavuratori
Ambient da lavur
Sco assistenta u assistent per il mantegniment d'autos lavuras ti en ina garascha en in team. Tes temps da lavur èn regulars, pon dentant esser pli intensivs durant tscherts temps durant l'onn.
Ti lavuras en filialas da gronds producents, tar commerziants da differentas marcas u en garaschas independentas.
Pretensiuns e interess
- Inschign manual
- Chapientscha tecnica
- Moda da lavurar sistematica
- Moda da lavurar conscienziusa ed exacta
- Abilitad da lavurar en in team
- Gronda toleranza da canera
- Resistenza corporala
- Schliar incumbensas tecnicas
- Lavurar cun ils mauns
- Lavurar cun maschinas
- Esser corporalmain activ
Scolaziun
furmaziun pratica en ina garascha: 4 dis per emna
1 di per emna en las scolas professiunalas spezialisadas chantunalas
en plirs chantuns en ils centers da scolaziun da l'Uniun professiunala svizra da l'automobil (UPSA): 20 dis durant 2 onns
2 onns
- terminà la scola obligatorica
- test da qualificaziun UPSA
Assistent / Assistenta per il mantegniment d'autos AFP
Furmaziun cuntinuonta
Emprendissadi supplementar
Sco assistenta u assistent per il mantegniment d'autos AFP pos ti per regla far in emprendissadi scursanì sco spezialista u spezialist d'autos AFQ.
Professiuns sumegliantas
