Spezialista per il transport cun la viafier AFQ
Spezialist per il transport cun la viafier AFQ
![[object Object],[object Object]](https://media.sdbb.ch/transform/7768e1e1-3e1a-4601-b9bd-e536abd85220/BahnfachEFZ-LF-5954-jpg?io=transform:fill,width:740,height:490)
1. onn d’emprendissadi: CHF 750.–
2. onn d’emprendissadi: CHF 1010.–
3. onn d’emprendissadi: CHF 1310.–
Las persunas spezialisadas per il transport cun la viafier preparan trens per il transport da rauba e da persunas. Ellas planiseschan la cumposiziun dals singuls vaguns ed organiseschan alura la partenza dals trens. Las lavureras ed ils lavurers collavuran stretgamain cun locomotivistas. Mintgatant mainan els sezs ina locomotiva per manevrar ils vaguns.
Incumbensas
- controllar las dumondas da differenta clientella, p.ex. da manaschis agriculs, supermartgads u producents d'automobils
- prender encunter la rauba, p.ex. graun, benzin, autos, chemicalias u pachets
- planisar la cumposiziun dal tren ed organisar en quest connex ils custs, ils termins sco er resguardar l'effizienza energetica, quai vul dir per exempel planisar viadis uschè directs sco pussaivel u guardar ch'ils trens sajan occupads
- preparar ils urdains, ils apparats ed ils vehichels, p.ex. ils apparats radiofonics u ils plunaders
- cumponer ils vaguns per trens da martganzia e mintgatant er per trens da persunas
- tatgar e distatgar las locomotivas
- sa cunvegnir sur func cun ils locomotivists sin las staziuns da manevrar u en il deposit
- communitgar a las locomotivistas, quant svelt ch'ellas dastgan charrar e nua ch'ellas ston passar
- manar las locomotivas per manevrar ils vaguns
- calcular las distanzas da franar
- chargiar u stgargiar ils containers da rauba sin ils vaguns
- cur ch'il tren è cumponì, al annunziar sco pront per partir
- procurar, che la rauba arriva punctualmain tar la clientella
- observar las prescripziuns da traffic e da segirezza, p.ex. reducziuns da la sveltezza cun transportar rauba privlusa
- controllar las locomotivas ed auters vehichels e garantir, ch'els funcziuneschan en moda correcta
- scriver rapports e documentar problems durant il viadi
Ambient da lavur
Persunas spezialisadas per il transport cun la viafier lavuran en il liber, en staziuns da manevrar (staziuns spezialas, en las qualas vaguns vegnan cumponids a trens), sin elements da colliaziun (binaris privats che collian lieus da producziun cun la rait da viafier publica) u en terminals da tren (plazza da transtgargiar rauba). Ellas lavuran per il solit en squadra ed han savens contact cun la clientella e cun differentas gruppas professiunalas sco locomotivists, logisticras u persunas spezialisadas da transports sin via. Ils temps da lavur èn irregulars. Els ston er lavurar la saira e las fins d'emna. Els fan activitads cun sforz corporal, p.ex. sch'els ston purtar parts grevas sco chadainas u crutschs. A la lavur portan els in equipament da protecziun cun chapellina, vestgadira traglischanta e chalzers da segirezza.
Persunas spezialisadas per il transport cun la viafier lavuran tar interpresas da viafier. Durant la scolaziun absolvan els ina scolaziun interna (categoria A40), per ch'els dastgian manipular las locomotivas da manevra en ils secturs previs per quest intent.
Pretensiuns e interess
- Abilitad da lavurar en in team
- Inschign manual
- Resistenza a la temperatura u a l'aura
- Resistenza corporala
- Plain fantasia e savair sa gidar
- Buna vesida
- Buna memoria
- Prontezza da lavurar durant uras irregularas u servetschs da notg
- Lavurar cun ils mauns
- Esser corporalmain activ
- Schliar incumbensas tecnicas
- Planisar, organisar
Scolaziun
En ina interpresa da viafier
1 di l'emna a la scola professiunala
Emprender la lavur pratica, approfundar ed exercitar las basas professiunalas, 15 fin 25 dis durant 3 onns.
3 onns
Terminà la scola obligatorica
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Spezialist / Spezialista per il transport cun la viafier AFQ
Furmaziun cuntinuonta
Curs
Purschidas da scolas professiunalas spezialisadas e da scolas spezialisadas, da la Svizra. Associaziun svizra per la furmaziun professiunala en logistica ASFL ed ulteriuras federaziuns professiunalas.
Examen professiunal (EP)
Cun certificat professiunal federal, per exempel:
- Spezialist / Spezialista da traffic public
- Locomotivist / Locomotivista
- Disponent / Disponenta da transports e logistica
Examen professiunal superiur (EPS)
P.ex. mainagestiun dipl. en transports e logistica
Professiuns sumegliantas
