Manadra d'implants AFQ
Manader d'implants AFQ
![[object Object],[object Object]](https://media.sdbb.ch/transform/35f9a9cf-b1c4-4dc8-b7f5-faf64b05a989/13_Anlagefuehrerin_FM-jpg?io=transform:fill,width:740,height:490)
1. onn d’emprendissadi: CHF 500–700.–
2. onn d’emprendissadi: CHF 700–900.–
3. onn d’emprendissadi: CHF 900–1100.–
Manadras e manaders d'implants da producziun manischeschan indrizs industrials automatics. Uschia sustegnan els la producziun da victualias, da medicaments, d'elements electronics u da materias sinteticas. Els configureschan las maschinas e procuran che talas funcziunian bain. Els intervegnan en la producziun en seria, sch'i dat problems.
Incumbensas
La nova ordinaziun da furmaziun davart la professiun Manader / Manadra d'implants AFQ è en vigur dapi il 1. da schaner 2026. Questa descripziun da la professiun vegn actualisada proximamain.
- survegliar la producziun e l'emballadi e controllar las lavurantas ed ils lavurants
- configurar ils indrizs tenor ils formats e tenor las materialias
- endatar online las datas da producziun
- configurar maschinas e survegliar lur diever
- lavurar en teams en la producziun en seria e diriger independentamain indrizs
- survegliar l'emballadi automatic da products
- adattar las configuraziuns da las maschinas d'emballadi, sche las dimensiuns dals products sa midan
- observar e controllar las mesiras da segirezza e d'igiena
- configurar regularmain ed exactamain maschinas ed indrizs, als survegliar e controllar, per exempel lur sveltezza, lur temperatura, il temp u il squitsch
- collavurar en il mantegniment d'indrizs tecnics sco er da sistems per il provediment d'energia
- sch'i dat disturbis, tschertgar sbagls, prender las mesiras necessarias, far reparaturas e reprender la producziun
- garantir la productivitad da las differentas maschinas e la qualitad dals products
- ensemen cun tecnicists modernisar maschinas per fabritgar novs products u emballadis
- optimar la productivitad d'indrizs e planisar correspundentamain las proceduras d'emballadi
- s'infurmar davart novas tecnicas d'elavuraziun e d'emballadi sco er davart novs process tecnics
- empustar materias primas e parts da products
- controllar la rauba furnida
- controllar las cundiziuns da deposit, per exempel umiditad da l'aria, temperatura e relaziuns da glisch
- collavurar cun furniturs e controllar las furniziuns avant la spediziun
Ambient da lavur
Manadras e manaders d'implants da producziun lavuran savens en teams ensemen cun lavurants da producziun, inschigneras u manaders da team. Tut tenor il gener dal manaschi industrial ston els savair ir enturn cun differentas cundiziuns da lavur, per exempel canera, chalur u spizza. Er lavur da notg e da squadra è pussaivla.
Manadras e manaders d'implants da producziun chattan vastas pussaivladads d'occupaziun en manaschis industrials che produceschan victualias, chemicalias, elements electronics, emballadis u medicaments. Cun qualificaziuns supplementaras correspundentas chattan els plazzas sco manaders da team u da sectur ubain sco manageras da planisaziun.
Pretensiuns e interess
- Chapientscha tecnica
- Inschign manual
- Moda da lavurar sistematica
- Abilitad da sa concentrar
- Abilitad da lavurar en in team
- Resistenza cunter stress
- Prontezza da lavurar durant uras irregularas u servetschs da notg
- Gronda toleranza da canera
- Lavurar cun maschinas
- Schliar incumbensas tecnicas
- Planisar, organisar
Scolaziun
En in manaschi industrial.
1 di per emna a la scola professiunala spezialisada.
Emprender la lavur pratica, approfundar ed exercitar las basas professiunalas, 28 dis durant 3 onns.
3 onns
Terminà la scola obligatorica
Sche las prestaziuns da scola èn fitg bunas, po vegnir frequentada la scola da maturitad professiunala durant la furmaziun da basa.
Manader / Manadra d'implants da producziun AFQ
Furmaziun cuntinuonta
Curs
Purschidas da scolas professiunalas spezialisadas sco er da l'Associaziun per la furmaziun da manaders / manadras d'implants da producziun FOMA.
Examen professiunal (EP)
Cun attestat professiunal federal, p.ex.:
- Spezialist / Spezialista d'automatica
- Logisticher / Logisticra
- Spezialist / Spezialista da logistica
- Spezialist / Spezialista da process
- Spezialist / Spezialista da producziun
Examen professiunal superiur (EPS)
Per exempel manader / manadra da facility management e maintenance.
Scola spezialisada superiura (SSS)
Furmaziuns en secturs parentads, per exempel tecnicist / tecnicista da construcziun da maschinas dipl. SSS u tecnicist / tecnicista da sistems dipl. SSS.
Scola auta spezialisada (SAS)
Studis en secturs parentads, p.ex. bachelor of science en tecnica da maschinas u en tecnica da sistems. Tut tenor la scola auta spezialisada valan differentas cundiziuns d'admissiun.
Professiuns sumegliantas
