Lavurs
Spezialists e spezialistas per il traffic public lavuran en interpresas naziunalas, regiunalas u municipalas da la viafier, dal tram u dal bus. Els èn occupads en vehichels, sin staziuns da viafier u en ina centrala. Els lavuran independentamain u sustegnan spezialists e spezialistas dal fatg. Els èn occupads en l’accumpagnament da trens u en la planisaziun.
Spezialists per il traffic public cun l’accent sin la planisaziun fan la partiziun dal persunal e dals vehichels. Uschia procuran els ch’il traffic na vegnia betg en las stretgas. Els elavureschan plans ed organiseschan en cas da necessitad sviaments per ch’il traffic funcziunia senza difficultads.
En l'accent da l’accumpagnament da trens lavuran spezialists per il traffic public sin la staziun u en ils trens. Els controlleschan per exempel ils bigliets ed infurmeschan davart plazs libers, staziuns u colliaziuns per la cuntinuaziun dal viadi. Cura ch’i dat in disturbi infurmeschan els la clientella al lieu. Ultra da quai segireschan els il vehichel tar defects u en cas d’urgenza.
Spezialists per il traffic public èn per exempel era occupads en il sectur dal management da disturbis e da l’infurmaziun da la clientella u tar differentas occurrenzas. Sch’ina purschida u ina colliaziun na po betg vegnir realisada tenor plan, examineschan ils spezialists las alternativas pussaivlas.
Spezialists per il traffic public sa cumportan avertamain vers carstgauns, èn eloquents e restan calms era en situaziuns difficilas. Els fan attenziun ch’els resguardian las prescripziuns legalas sco era ils criteris dal manaschi ed ils criteris ecologics e tecnics.
Scolaziun
Basa legala
Ordinaziun federala 20-9-2014
Durada
3 onns
Accents
- planisaziun
- accumpagnament da trens
Furmaziun en la pratica
En in’interpresa svizra, municipala u regiunala da la viafier, dal tram u dal bus. En il 3. onn d’emprendissadi datti ina spezialisaziun en accumpagnament dal tren u planisaziun
Furmaziun en scola
1 di per emna al center da furmaziun professiunala BBZ ad Olten
Roms professiunals
- planisaziun da l’utilisaziun dal persunal e dals vehichels
- surventscher divergenzas nunprevisas en il funcziunament normal
- segirar il manaschi, il traffic, la segirezza e la qualitad da vehichels
- accumpagnar ed assister la clientella al lieu
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "spezialist / spezialista per il traffic public AFQ"
Premissas
Furmaziun preliminara
- scola populara terminada
Pretensiuns
- entusiassem per il mund dal traffic
- plaschair vi dal contact cun la clientella
- pensar cumplessiv
- abilitad da communitgar e plaschair vi da linguas estras (englais e secunda lingua naziunala)
- fidadadad e senn da responsabladad
- prontadad per temps da lavur irregulars
Furmaziun supplementara
Curs
purschidas da scolas professiunalas, da centers da furmaziun supplementara sco era d’associaziuns professiunalas e federaziuns interprofessiunalas
Examen professiunal (EP)
p.ex. spezialist / spezialista per il traffic public cun certificat professiunal federal
Examen professiunal superiur (EPS)
p.ex. manager diplomà / managera diplomada per il traffic public
Scola spezialisada superiura (SSS)
spezialist diplomà / spezialista diplomada dal turissem SSS, manager diplomà / managera diplomada da marketing SSS
Scola auta spezialisada (SAS)
Bachelor of Science da sistems da traffic; Bachelor of Science da turissem; Bachelor of Science da Business Administration, approfundaziun en turissem e mobilitad
Cundiziuns da lavur
Spezialists per il traffic public lavuran en interpresas naziunalas, regiunalas u municipalas da la viafier, dal tram u dal bus. Els èn occupads en vehichels, sin staziuns da la viafier u en ina centrala.
Ils temps da lavur pon esser irregulars ed ins sto per part era lavurar la saira u la fin d’emna.
Ulteriuras infurmaziuns
Verband öffentlicher Verkehr VöV
Dählhölzliweg 12
Postfach
3005 Berna
Tel: 031 359 23 23
URL: www.voev.ch
login Berufsbildung
Bewerbungszentrum
Riggenbachstr. 8
Postfach
4601 Olten
Tel: 0848 822 422
URL: www.login.org