Spezialist per il transport cun la viafier AFQ
Spezialista per il transport cun la viafier AFQ

Verkehr
Logistik
Durada
3 onns
Terminaziun
Eidgenössisches Fähigkeitszeugnis EFZ
Recumandaziuns davart il salari

1. onn d’emprendissadi: CHF 750.–
2. onn d’emprendissadi: CHF 1010.–
3. onn d’emprendissadi: CHF 1310.–

Sco spezialista u spezialist per il transport cun la viafier preparas ti trens per il transport da rauba e da persunas. Ti planiseschas la cumposiziun dals vaguns ed organiseschas alura la partenza dals trens. Ti collavuras stretgamain cun locomotivistas e locomotivists. Mintgatant mainas ti sezza u sez ina locomotiva per manevrar ils vaguns.

Incumbensas

Planisar ed organisar
  • controllar dumondas da la clientella, p.ex. da manaschis agriculs, supermartgads u producents d'automobils
  • prender encunter la rauba, p.ex. graun, benzin, autos, chemicalias u pachets
  • planisar ed organisar la cumposiziun dal tren
  • resguardar ils termins sco er resguardar l'effizienza energetica, quai vul dir p.ex. planisar viadis uschè directs sco pussaivel u guardar ch'ils trens sajan occupads
  • preparar ils urdains, ils apparats ed ils vehichels, p.ex. ils apparats radiofonics u ils plunaders
Manevrar ils vaguns
  • communitgar per func a las locomotivistas u als locomotivists che dirigian la locomotiva en la staziun da manevrar u en il deposit, cun tge sveltezza e nua ch'els duain charrar
  • suenter ina scolaziun interna manar locomotivas per manevrar ils vaguns
  • calcular las distanzas da franar
  • transportar ils trens entaifer il termin fixà
  • controllar las locomotivas ed auters vehichels e garantir, ch'els funcziunian
  • scriver rapports e documentar problems
Metter ensemen ils vaguns
  • furmar trens da rauba e da persunas cun cumponer differents vaguns
  • attatgar e distatgar las locomotivas
  • chargiar u stgargiar ils containers da rauba sin ils vaguns
  • cura ch'il tren è cumponì, al annunziar sco pront per partir
  • observar las prescripziuns da traffic e da segirezza, p.ex. en connex cun il transport da rauba privlusa 

Ambient da lavur

Sco spezialista u spezialist per il transport cun la viafier lavuras ti principalmain al liber, en staziuns da manevrar, sin trajects da colliaziun u en terminals da tren, nua ch'i vegn chargià rauba. En quest connex has ti savens contact cun la clientella e cun autras persunas spezialisadas da viafier. Tias uras da lavur èn irregularas, e ti stos er lavurar la saira e las fins d'emna. Ti liquideschas lavurs che dovran forza corporala e stos per part purtar parts grevas. A la lavur portas in equipament da protecziun cun chapellina, vestgadira traglischanta e chalzers da segirezza.

Ti lavuras tar interpresas da viafier. Durant la scolaziun absolvas ti ina scolaziun interna (categoria A40), per che ti dastgias utilisar locomotivas da manevra en ils secturs previs per quest intent. Cun in'experientscha professiunala d'intgins onns e cun la furmaziun supplementara correspundenta pos ti p.ex. daventar locomotivista u disponent da transport e logistica.

Pretensiuns e interess

Pretensiuns
  • Abilitad da lavurar en in team
  • Prontezza da lavurar durant uras irregularas u servetschs da notg
  • Inschign manual
  • Resistenza a la temperatura u a l'aura
  • Resistenza corporala
  • Plain fantasia e savair sa gidar
  • Buna vesida
  • Buna memoria
Interess
  • Schliar incumbensas tecnicas
  • Planisar, organisar
  • Lavurar cun ils mauns
  • Esser corporalmain activ

Furmaziun

La scolaziun vegn fatga sco emprendissadi en in manaschi.

Manaschis

Furmaziun pratica en ina interpresa da viafier: 4 dis per emna

Scola

1 di per emna en las scolas professiunalas spezialisadas chantunalas

Curs odaifer il manaschi

Spreitenbach (AG): 15 dis durant 3 onns

Durada

3 onns

Cundiziuns d'admissiun
  • Vegliadetgna minimala da 16 onns (fin ils 30 da november dal 1. onn d'emprendissadi)
  • Terminà la scola obligatorica  
  • Intgins manaschis pretendan in test da qualificaziun  
Maturitad professiunala

Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.

Titel da finiziun

Spezialist / Spezialista per il transport cun la viafier AFQ

Furmaziun cuntinuanta

Curs

Purschidas da l'associaziun Swiss Logistics

Examen professiunal (EP)

  • Locomotivist / Locomotivista EP
  • Spezialist / Spezialista da traffic public EP
  • Spezialist / Spezialista da logistica EP
  • Disponent / Disponenta da transports e logistica EP

Examen professiunal superiur (EPS)

  • Mainagestiun transport e logistica EPS
  • Manager / Managera dal traffic public EPS

Scola auta spezialisada (SAS)

  • Bachelor of science en inschigneria economica

Tut tenor la scola auta spezialisada valan differentas cundiziuns d'admissiun.

Ulteriuras infurmaziuns