![[object Object],[object Object]](https://media.sdbb.ch/transform/44655b35-2a20-4a3c-b8ec-1674b4590b52/04_Orthop-schuhm_FM-jpg?io=transform:fill,width:740,height:490)
1. onn d’emprendissadi: CHF 600.–
2. onn d’emprendissadi: CHF 800.–
3. onn d’emprendissadi: CHF 1000.–
4. onn d’emprendissadi: CHF 1200.–
Chalgeras e chalgers d'ortopedia fan chalzers ortopedics sin mesira ed en seria sco er solas ortopedicas, autras solas e posapes. Ellas ed els fan er correcturas posteriuras e reparaturas.Ultra da quai cusseglian ellas ed els la clientella en la tscherna da chalzers ortopedics.
Incumbensas
- retschaiver la clientella, consultar ordinaziuns medicalas e recepts
- controllar ils pes e far cun differentas tecnicas improntas e visualisaziuns da las plantas-pe durant il passar sin ils pes, uschenumnads podograms
- far in model e furmar il pe cun faschas da gip e cun stgima da rigiditad
- producir in chalzer d'emprova or da material termoplastic transparent, che s'adatta perfetgamain a las curvas dal model
- far schablonas per las differentas parts dal chalzer, per exempel per il nutigl, il letg dal pe u la sola
- tagliar, cumbinar, cuser e tatgar las differentas parts
- metter ensemen il chalzer cun ils rinforzaments ed ils plimatschs necessaris
- empruvar il chalzer vi dal pe e controllar, sch'il model, la sola, il sustegn e l'equiliber static correspundan als giavischs
- adattar chalzers producids en seria, per exempel cun integrar letgs e sustegns dal pe, cun auzar la sola, cun rinforzar e pulstrar il nutigl
- producir sin mesira ortesas e solas ortopedicas or da differentas materialias
- producir ed adattar protesas dals pes a maun d'ina furma fatga aposta per la clientella
- scriver quints e far la contabilitad
- empustar rauba, administrar l'inventari dal magasin, tegnair en urden il material e las maschinas
Ambient da lavur
Chalgeras e chalgers d'ortopedia lavuran principalmain sulets u en pitschens teams en in lavuratori, nua ch'ellas ed els retschaivan la clientella per prender mesira e per far improntas sco er per empruvar en ils chalzers. Ellas ed els lavuran er en la butia, nua ch'ellas ed els vendan chalzers ortopedics da seria e meds auxiliars.
Ellas ed els collavuran cun medias, fisioterapeuts, ergoterapeutas, tecnicists d'ortopedia, podologas e chalgers. Lur temps da lavur èn regulars. Chalgeras e chalgers d'ortopedia lavuran en ateliers per tecnica da chalzers ortopedica u en clinicas d'ortopedia.
Suenter avair absolvì ina furmaziun supplementara correspundenta, pon ellas ed els avrir in'atgna fatschenta.
Pretensiuns e interess
- Imaginaziun tridimensiunala
- Empatia
- Curtaschia e sensibilitad
- Creativitad
- Inschign manual
- Moda da lavurar conscienziusa ed exacta
- Plaschair da vender e da cussegliar
- Lavurar cun taila, tgirom e palpiri
- Lavurar cun ils mauns
- Lavurar sulet ed en moda independenta
- Avair contact cun persunas
Scolaziun
En ina clinica d'ortopedia u en in atelier per tecnica da chalzers ortopedica
1 di per emna en ina da las scolas professiunalas spezialisadas:
- Zofingen (AG)
- Losanna (VD)
Emprender la lavur pratica, approfundar ed exercitar las basas professiunalas, 20 dis durant 4 onns
4 onns
Terminà la scola obligatorica
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun da basa.
Chalger / Chalgera d’ortopedia AFQ
Furmaziun cuntinuonta
Curs
Purschidas da scolas spezialisadas e da scolas professiunalas spezialisadas sco er da l'Associaziun PE & CHALZER
Examen professiunal (EP)
P.ex. Spezialist / Spezialista da tecnica da chalzers ortopedica cun attestat professiunal federal
Examen professiunal superiur (EPS)
P.ex. Chalgera / Chalger d'ortopedia
Professiuns sumegliantas
