Lavurs
Storas, schalusias e barcuns reduceschan l’effect stgaudant da l’irradiaziun dal sulegl. Els protegian era cunter la glisch tschorventanta, egliadas mirvegliusas e pulvra. Uschia procuran els per in’atmosfera d’abitar e lavurar agreabla.
Practicists e practicistas da montascha da storas installeschan e reparan quests sistems da protecziun cunter il sulegl en lavur da team. Avant mintga incumbensa calculeschan els il material che vegn duvrà. Els preparan il material per il transport. Sin il plazzal stgargian els las storas, las maschinas ed il material pitschen or dal vehichel e portan la tocca per part greva tar l’edifizi.
Practicists da montascha da storas mesiran nua che las novas storas ed ils motors da propulsiun ston vegnir fixads. En lavur da team tegnan els la tocca da construcziun al dretg lieu e la fixeschan cun in tarader. A la fin controlleschan practicists da montascha da storas, sche las storas funcziunan senza problem.
Las storas veglias vegnan demontadas ed allontanadas a moda adattada a l’ambient. Durant l’utilisaziun da maschinas e guaffens resguardan els las prescripziuns davart la segirezza da la lavur.
Scolaziun
Basa legala
Ordinaziun federala 21-10-2016
Durada
2 onns
Furmaziun en la pratica
En in manaschi da la branscha da paraids e mirs exteriurs d’edifizis
Furmaziun en scola
Curs en bloc a la scola professiunala a Uzwil/SG
Roms professiunals
- prescripziuns e mesiras davart la segirezza da lavur e la protecziun da la sanadad e da l’ambient
- installaziun da stresas e sistems vi da paraids e mirs exteriurs
- montar ils sistems da storas
Curs ordaifer il manaschi
Emprender ed exercitar a moda pratica la basa professiunala
Diplom
Attestat federal professiunal "practicist / practicista da montascha da storas AFP"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- enclegientscha tecnica
- sanadad robusta
- flexibilitad corporala
- esser senza sturnizi
- abilitad da lavurar en in team
Furmaziun supplementara
Curs
purschidas da scolas spezialisadas e scolas professiunalas, da l’uniun Polybau sco era da manaschis da la branscha da paraids e mirs d’exteriur d’edifizis
Montader / Montadra da storas AFQ
Practicists da montascha da storas AFP pon frequentar ina furmaziun scursanida sco montader / montadra da storas AFQ (entrada al 2. onn da furmaziun da basa).
Suenter quai han els las medemas pussaivladads da furmaziuns supplementara so montaders / montadras da storas AFQ.
Cundiziuns da lavur
Practicists da montascha da storas lavuran en manaschis che mettan en vendita sistems da protecziun cunter il sulegl e sistems da protecziun cunter l’aura. Quai èn per ordinari manaschis da montascha pitschens u fitg paucs manaschis d’industria gronds.
Ulteriuras infurmaziuns
Uniun Polybau
Lindenstr. 4
Postfach
9240 Uzwil
Tel: 071 955 70 41
URL: www.polybau.ch