Lavurs
Practicists e practicistas cuvratetgs utiliseschan quadrels da tun, fibrocement, metal e plattamorta natirala. Cun lavur precisa protegian els in edifizi cunter l’umiditad, il fraid e la chalur.
Practicists cuvratetgs francheschan subconstrucziuns or da lattas da lain cun agid da struvas. Vi da quels fixeschan els silsuenter ils quadrels ed auter material da cuvrida.
Practicists cuvratetgs utiliseschan ascensurs per transportar ils quadrels sin il tetg. Els portan ils quadrels al dretg lieu ed als surdattan als tetgers.
Avant tut las lavur calculeschan practicists cuvratetgs la quantitad dal material da cuvrida che vegn duvrà. Els preparan il material per il transport al plazzal e chargian il vehichel da la firma.
Practicist cuvratetgs lavuran a l’autezza e ston perquai esser senza sturnizi. Els enconuschan ils ristgs e privels dal plazzal. Els resguardan adina las prescripziuns davart la segirezza da la lavur e la protecziun da l’ambient. Material restant e rument magasineschan ed allontaneschan els a moda adattada a l’ambient.
Scolaziun
Basa legala
Ordinaziun federala 21-10-2016
Durada
2 onns
Furmaziun en la pratica
En in manaschi da la branscha da paraids e mirs exteriurs d’edifizis
Furmaziun en scola
Curs en bloc a la scola professiunala a Uzwil/SG
Roms professiunals
- prescripziuns e mesiras davart la segirezza da lavur e la protecziun da la sanadad e da l’ambient
- installaziun da stresas e sistems vi da paraids e mirs exteriurs
- tschentar ils sistems da tetg
Curs ordaifer il manaschi
Emprender ed exercitar a moda pratica la basa professiunala
Diplom
Attest federal professiunal "practicist / practicista cuvratetgs AFP"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- enclegientscha tecnica
- sanadad robusta
- flexibilitad corporala
- esser senza sturnizi
- abilitad da lavurar en in team
Furmaziun supplementara
Curs
purschidas da scolas spezialisadas e scolas professiunalas, da l’uniun Polybau sco era da manaschis da la branscha da paraids e mirs d’exteriur d’edifizis
Cuvratetgs AFQ
Practicists cuvratetgs AFP pon frequentar ina furmaziun scursanida sco cuvratetgs AFQ (entrada al 2. onn da furmaziun da basa).
Silsuenter han els las medemas pussaivladads da furmaziun supplementara sco cuvratetgs AFQ.
Cundiziuns da lavur
Practicists da cuvridas da tetg lavuran en manaschis da la branscha da paraids e mirs exteriurs d’edifizis u en uschenumnads manaschis maschadads (mirs exteriurs d’edifizis e tolaria).
Quai èn per ordinari manaschis pitschens u mesauns.
Practicists da cuvridas da tetg pon era lavurar en manaschis d’industria che fabritgeschan products per paraids e mirs exteriurs.
Ulteriuras infurmaziuns
Verein Polybau
Lindenstr. 4
Postfach
9240 Uzwil
Tel: +41 71 955 70 41
URL: www.polybau.ch