Lavurs
Practicists e practicistas per lavurs da fundament lavuran en il sectur da la construcziun bassa speziala. Els èn sin il plazzal avant che las lavurs da construcziun effectivas per vias da traffic u per edifizis cumenzan. Els procuran ch’il fundament per ina construcziun saja stabil e segir.
Practicists per lavurs da fundament drizzan en in magazin sin il plazzal. Els stgargian il material ed ils apparats dal camiun: laina per entuladas, meds da funcziun e dad unscher sco era tocca da reserva per las maschinas da construcziun, filters, chaus da sondagi, astas da perfuraziun euv. Els installeschan maschinas e construcziuns da sondagi ensemen cun lur superiurs. Pitschnas lavurs da service vi dals apparats u vi dals utensils san els exequir independentamain.
Practicists per lavurs da fundament èn preschents durant tut las lavurs da la construcziun bassa speziala: per exempel tar la segirada da stgavs da construcziun cun entuladas da betun, mirs da sustegn e saivs. Els pitgan pals en il fundament, pumpan giu aua e sprizzan en betun. Els pon leger plans e lavurar tenor quels plans. Las lavurs exequidas scrivan els en in rapport.
Practicists per lavurs da fundament lavuran en in team ed èn dador da tutt’aura. Els enconuschan ils privels dal plazzal e protegian sasezs ed ils collavuraturs cun resguardar las prescripziuns pertutgant la segirezza da lavur. Els prendan mesiras per la prevenziun d’accidents e portan la vestgadira da protecziun persunala.
Els fan attenziun a las prescripziuns davart la protecziun da l’ambient ed allontaneschan materials duvrads, substanzas dad unscher e products da nettegiar tenor las directivas dal manaschi.
Scolaziun
Basa legala
Ordinaziun federala 1-11-2013
Durada
2 onns
Furmaziun en la pratica
En in’interpresa da la construcziun bassa speziala
Furmaziun en scola
Curs en bloc a la scola professiunala per constructurs e constructuras da vias da traffic a Sursee: en tut 18 emnas, da quellas 2 emnas furmaziun spezialisada “construcziun da fundament” a Sempach
Roms professiunals
- organisaziun da las lavurs e garanzia da la segirezza da lavur sco era da la protecziun da la sanadad e da l’ambient
- execuziun da lavurs generalas en la construcziun da vias da traffic
- execuziun da lavurs da la construcziun da fundament
Curs ordaifer il manaschi
Emprender ed exercitar a moda pratica la basa professiunala
Diplom
Attest federal professiunal "practicist / practicista per lavurs da fundament AFP"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- enclegientscha tecnica
- fidadadad e perseveranza
- abilitad da lavurar en in team
- forza corporala
- sanadad robusta
Furmaziun supplementara
Curs
purschidas da scolas spezialisadas e scolas professiunalas, dal Campus Sursee (Bildungszentrum Bau), da l’Associaziun svizra per maisters constructurs, da l’Associaziun professiunala Infra sco era curs entaifer il manaschi.
Sondader / Sondadra AFQ
Practicists / practicistas per lavurs da fundament pon frequentar ina furmaziun scursanida sco sondader / sondadra AFQ (entrada al 2. onn da furmaziun da basa).
Suenter quai han els las medemas pussaivladads da furmaziun supplementara sco sondaders / sondadras AFQ.
Cundiziuns da lavur
Practicists e practicistas per lavurs da fundament lavuran en in’interpresa dal sectur da la construcziun bassa speziala. Els han incumbensas en l’entira Svizra, uschia ch’els èn savens sin viadi.
Ulteriuras infurmaziuns
Berufsfachschule Verkehrswegbauer
Postfach
6210 Sursee
Tel: 041 922 26 26
URL: www.verkehrswegbauer.ch
URL: www.bauberufe.ch
Fachverband Infra
Weinbergstr. 49
Postfach
8042 Zürich
Tel: 044 258 84 90
URL: www.infra-schweiz.ch
Revista professiunala:
"B. Magazin - Das Magazin für Verkehrswegbauer"