Lavurs
Practicistas e practicists da stuccatura surtiran paraids e palantschieus sura cun gip ed auters materials. Questa lavur numn'ins smaultar. Uschia vegnan d’ina vart rinforzads e protegids las paraids ed ils palantschieus sura. Da l’autra vart vegnan gulivadas chavas e rusnas, uschia che la surfatscha daventa glischa.
Avant che smaultar examineschan e giuditgeschan practicists da stuccatura il sutterren. Els preparan il sutterren e cuvran auters elements da construcziun, per exempel cun folia u cun crep da picturs.
Practicists da stuccatura construeschan era spartidas e tavlegiadas. Quai fan els cun plattas da construcziun en gip. Per ina cuvrida dal palantschieu sura monteschan els profils da metal vi dal palantschieu sura e fixeschan las plattas da gip cun struvas.
Avant mintga lavur calculeschan practicists da stuccatura il basegn da material e preparan silsuenter il material ed ils utensils.
Practicists da stuccatura lavuran dadens e dadora. Els lavuran sin plazzals da renovaziuns, da midadas d’edifizis u da construcziuns novas. Il pli savens lavuran els en in team.
Practicists da stuccatura allontaneschan il material restant ed il rument a moda adattada a l'ambient. Els resguardan adina las prescripziuns davart la segirezza da la lavur e la protecziun da l’ambient.
Scolaziun
Basa legala
Ordinaziun federala 22-7-2014
Durada
2 onns
Furmaziun en la pratica
En in manaschi da stuccatura
Furmaziun en scola
Curs da bloc en il center da scolaziun da l'Associaziun svizra dals interprendiders picturs ed interprendiders da stuccatura SMGV a Wallisellen ZH (10 curs da bloc da mintgamai in’emna per onn da scolaziun). Per emprendists che abiteschan lunsch davent stattan a disposiziun albierts.
Roms professiunals
- planisaziun, preparaziun e rapport da las lavurs
- smaultar e montar plattas da construcziun en gip
- garanzia da la segirezza da la lavur, da la protecziun da la sanadad e da la protecziun da l’ambient
Curs ordaifer il manaschi
Emprender ed exercitar la basa professiunala
Diplom
Attestat federal professiunal "practicist / practicista da stuccatura"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- forza fisica
- conscienza da servetschs
- nagina tema d’autezza
Furmaziun supplementara
Curs
purschidas da scolas spezialisadas e professiunalas sco era da l'Associaziun svizra dals interprendiders picturs ed interprendiders da stuccatura SMGV
Stuccatur e construider / Stuccatura e construidra da materialias sitgas AFQ
Practicists da stuccatura AFP pon absolver ina furmaziun scursanida sco stuccatur e construider da materialias a sitgas AFQ (access al segund onn da la furmaziun). Suenter han els las medemas pussaivladads da furmaziun supplementara sco stuccaturs e construiders da materialias a sitgas AFQ .
Cundiziuns da lavur
Practicists da stuccatura lavuran en manaschis da stuccatura. Quai èn savens manaschis pitschens e manaschis mesauns cun 2 fin 20 collavuraturs.
En la branscha manca glieud professiunala qualifitgada. Practicists da stuccatura han perquai bunas schanzas da chattar in plazza da lavur.
Ulteriuras infurmaziuns
Associaziun svizra dals interprendiders picturs ed interprendiders da stuccatura SMGV
Grindelstr. 2
Chascha postala 73
8304 Wallisellen
Tel: 043 233 49 00
URL: www.gipser-werden.ch