Lavurs
Assistents ed assistentas da biro scrivan al computer brevs, e-mails, protocols, notizias d’actas, tabellas e glistas. Per part dovran els latiers models e formulars. Els han bunas enconuschientschas dal PC e san era co che squitschaders ed apparats da fotocopiar e fax funcziunan. Els midan las cassettas da toner e las rollas da palpiri e dismettan material duvrà a moda ecologica.
Assistentas da biro fan servetsch al telefon e preschentan a la clientella products e prestaziuns dal manaschi. Durant telefonar cun clients noteschan ellas lur giavischs ed als renvieschan a las persunas responsablas. Ellas beneventan giasts sco era partenaris da fatschenta ed als accumpognan tar las persunas giavischadas. Ultra da quai planiseschan ellas termins e fan attenziun che quels vegnan era ademplids.
Assistentas da biro èn era responsablas per la posta. Ellas assorteschan e distribueschan la posta. En pli administreschan ellas il material da biro. Per diversas occurrenzas mettan ellas ensemen documents e documentaziuns.
En la contabilitad exequeschan assistentas da biro simplas lavurs sco per exempel pajaments e transacziuns tras la banca u la posta. Ellas fan era lavur da rendaquint ed elavureschan statisticas.
En il mintgadi da lavur resguardan assistentas da biro normas e reglas per proteger e conservar datas e documents. Ellas archiveschan documents per exempel tenor alfabet, spezialisaziun, firmas da furniziun u artitgels. Quellas lavurs ston vegnir exequidas a moda exacta per chattar en il futur tut ils documents. Bleras datas e blers documents vegnan era arcunads electronicamain en in agen sistem, uschia ch’els èn visibels al computer da tut temp. Ultra da quai segireschan ellas datas e fan backups.
Scolaziun
Basa legala
Ordinaziun federala 5-5-2010
Durada
2 onns
Furmaziun en la pratica
En l’administraziun d’in manaschi
Furmaziun en scola
A la scola professiunala: en l’emprim semester: 2 dis, dal 2. – 4. semester: 1 di per emna
Roms professiunals
- tudestg
- infurmaziun, communicaziun, administraziun
- economia e societad
Curs d’elecziun e da sustegn sco era curs cumplementars per l’access a la scolaziun da basa scursanida sco commerziant / commerzianta AFQ èn pussaivels.
Curs ordaifer il manaschi
Tar differents temas
Diplom
Attestat federal professiunal "assistent / assistenta da biro AFP"
Premissas
Furmaziun preliminara
- scola populara terminada
Pretensiuns
- interess vi da lavurs da biro
- plaschair da lavurar al computer
- buna enclegientscha dal tudestg a bucca ed en scrit
- moda da lavur exacta
- plaschair vi da far quints
- avertadad ed amicabladad en contact cun persunas
- abilitad da lavurar en in team
- fidadadad cun senn da responsabladad
- talent d’organisaziun
Furmaziun supplementara
Curs
purschidas da scolas spezialisadas e professiunalas ed en centers da furmaziun supplementara
Commerziant / Commerzianta AFQ
Assistentas da biro AFP pon far cun fitg bunas prestaziuns ina scolaziun da basa scursanida sco commerziant / commerzianta AFQ (profil B) cun attest federal da qualificaziun (access en il 2. onn da la furmaziun da basa professiunala). Silsuenter valan las medemas pussaivladads da furmaziun supplementara sco per commerziants / commerziantas AFQ.
Cundiziuns da lavur
Assistentas da biro lavuran en differentas interpresas e manaschis. En cumparegliaziun cun ils commerziants cun diplom federal da qualificaziun AFQ han ellas paucas pussaivladads da sa furmar supplementarmain e da far carriera.
La purschida da plazzas d’emprendissadi è minima ed è da chantun tar chantun fitg differenta.
Ulteriuras infurmaziuns
IGKG Interessengemeinschaft Kaufmännische Grundbildung
Schwanengasse 9
Postfach
3001 Bern
Tel: 031 398 26 10
URL: www.igkg.ch