Lavurs
In toc vestgadira sa resulta or da plirs pass da lavur: tagliar la taila tenor il model a tagl, cuser ensemen las tailas correspundentas cun agid da la maschina da cuser, cuser en serranetgas e far ora cun il fier per furmar il vestgì tenor giavisch. Cusunzs e cusunzas exequeschan tut quels pass da lavur. Lur lavur planiseschan els ensemen cun lur superiurs.
Avant ch’els cusan, fixeschan cusunzs la tocca tagliada cun vlieselina e cun il fier. Els enconuschan las caracteristicas da las differentas tailas ed installeschan correspundentamain la maschina da cuser. Els mettan il fil en guglia, elegian il pe da la maschina da cuser optimal e determineschan la lunghezza dal pitg. Silsuenter cusan els ils tocs da vestgadira.
Cusunzs taglian las foras dals buttuns e cusan si ils buttuns, cusan en serranetgas u cusan giaglioffas sin la vestgadira. Els controlleschan successivamain la lavur fatga, per exempel il decurs da la cusadira.
Cusunzs da vestgadira speziala fan ora cun il fier il vestgì tranter ils differents pass da lavur ed al stiran en la dretga furma. Il fier e la staziun da vapur vegnan endrizzads uschia che la chalira e l’umiditad van a prà cun la taila. Els san cura ch’i fa da basegn d’utilisar in agid da stirar. Per finir vegn controllà la cumparsa generala da la vestgadira.
Scolaziun
Basa legala
Ordinaziun federala 1-11-2013
Durada
2 onns
Furmaziun en la pratica
En in manaschi da la branscha da la moda u da textilias
Furmaziun en scola
1 di per emna a la scola professiunala
Roms professiunals
- endrizzar il plaz da lavur e preparar las lavurs
- rinforzar e fixar las parts tagliadas
- cuser tocs da taila
- stirar e metter en furma tocs da vestgadira
- garantir la segirezza da lavur, la protecziun da la sanadad e da l’ambient
Curs ordaifer il manaschi
Emprender ed exercitar a moda pratica la basa professiunala
Diplom
Attest federal professiunal "cusunz / cusunza da vestgadira speziala AFP"
Premissas
Furmaziun preliminara
- scola populara terminada
Pretensiuns
- senn per furmas e colurs
- bun inschign
- bun sentiment per trends en la moda
- perseveranza
Furmaziun supplementara
Curs
purschidas dal Schweiz. Modegewerbeverband SMGV, da la Schweiz. Textilfachschule STF e da scolas autas spezialisadas
Creatur / Creatura da vestgadira AFQ
Cusunzs / cusunzas da vestgadira speziala AFP pon far ina furmaziun scursanida sco creatur / creatura da vestgadira AFQ (entrada en il 2. onn da scolaziun).
Silsuenter han ellas las medemas pussaivladads da furmaziun supplementara sco ils creaturs / creaturas da vestgadira AFQ.
Cundiziuns da lavur
Cusunzs da vestgadira speziala lavuran en ateliers da la branscha da moda u da textilias u en ina cusunzaria per midadas. Tut tenor plazza e tenor la situaziun da las empustaziuns lavuran els a moda independenta e ston vegnir a frida cun squitsch da temp.
Ulteriuras infurmaziuns
SwissMode
Schweizerischer Berufsverband für Bekleidungsgestaltung
Carmenstr. 52
8032 Zürich
Tel: 044 252 32 84
URL: www.swissmode.org
IBBG Interessengemeinschaft Berufsbildung Bekleidungsgestalter/in
Aarauerstr. 30
4600 Olten
Tel: 062 311 82 59
URL: www.ibbg.ch
Schweizerischer Modegewerbeverband SMGV
URL: www.smgv-usmm.ch