Lavurs
Creadras da vestgadira sviluppan e taissan tailas cun agid da talers a maun e da talers dirigids dal computer. Ellas elavuran fibras natiralas sco launa, mangola, glin e saida sco era fibras artifizialas e materials betg textils.
Els produceschan tailas da gronda qualitad per vestgadira, accessoris u textilias interiuras sco rauba da maisa, sumbrivals, tailas per mobiglias e tarpuns. Els fabritgeschan era tailas spezialas per objects d’art u per costums.
Creaders da textilias sviluppan lur products tenor atgnas ideas u tenor ils giavischs da la clientella. Sin palpiri u al computer elavuran els sbozs e resguardan latiers la teoria da las colurs ed ils trends en la moda e la decoraziun d'interiurs. Suenter la tscherna dal material fan els in dissegn tecnic – numnà patrona – che gida ad installar il taler avant il process da taisser. Musters per la colur e per la qualitad produceschan els directamain al taler. Avant che taisser ston els plinavant calcular la taila ed il material sco er il dumber dals fils.
Cun il tractament posteriur obtegna il tessì sia qualitad definitiva. Creadras da textilias utiliseschan per quai metodas sco lavar, far vegnir grugl e decatar. La metoda da decatar è in tractament cun vapur, che impedescha che la taila giaja en pli tard. Tut tenor l'artitgel e l’incumbensa dal client elavuran e cusan ellas las tailas. Quellas èn savens fabricaziuns unicas e serias pitschnas ch'ellas preschentan en l'agen affar sco era sin fieras ed exposiziuns.
Scolaziun
Basa legala
Ordinaziun federala 26-5-2010
Durada
3 onns
Furmaziun en la pratica
- en ina tessaria a maun
- al Centro scolastico per le industrie artistiche CSIA, Lugano (scolaziun a temp cumplain da 4 onns, talian sco lingua d’instrucziun)
Furmaziun en scola
Curs da bloc a la Scola professiunala Sta. Maria/Val Müstair (Scola Industriala): 3 blocs per onn à 2 emnas
Roms professiunals
- sviluppar e planisar incumbensas e projects
- realisar incumbensas e projects
- segirezza da la lavur, protecziun da la sanadad, protecziun da l’ambient, mantegniment da la valur
Curs ordaifer il manaschi
1 emna per onn da la furmaziun da basa a Schiers, Lugano e Basilea tenor il plan da furmaziun
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "creader / Creadra da textilias AFQ"
Premissas
Furmaziun preliminara
- scola obligatorica terminada cun pretensiuns mesaunas u grondas
-
Ultra da quai esì necessari per l'access al Centro scolastico per le industrie artistiche a Lugano da:
- avair bunas enconuschientschas dal talian
- reussir l'examen d'admissiun
Pretensiuns
- inschign manual
- dun da dissegnar
- buna imaginaziun dal spazi
- chapientscha tecnica
- senn per colurs e furmas
- creativitad
- pazienza e perseveranza
- pensar a moda orientada a la clientella
Furmaziun supplementara
Curs
purschidas da l'Uniun per il taisser artisanal IGW/UTA, da scolas d’art applitgà sco era d’associaziuns professiunalas
Examen professiunal superiur (EPS)
p.ex. maister textil / maistra textila dipl., designer / designra da fashion dipl.
Scola spezialisada superiura (SSS)
p.ex. creader / creadra SSS design da products (spezialisaziun design da textilias), tecnicist / tecnicista dipl SSS textilias
Scola auta spezialisada (SAS)
studis en secturs parentads, p.ex. Bachelor/Master of Arts (SAS) en conservaziun e restauraziun cun approfundaziun textilias) u Bachelor/Master of Arts (SAS) en intermediaziun d’art e design
Cundiziuns da lavur
Creaders e creadras da textilias lavuran en ateliers da taisser. La purschida da plazzas da lavur e pitschna. Ulteriuras pussaivladads d’engaschament porschan l’industria da textilias, scolas, ateliers terapeutics e sporadicamain era museums, nua che tailas anticas vegnan restauradas.
Creadras da textilias enconuschan ils trends da la moda e da la decoraziun d'interiurs. Per pudair sa profilar sin in martgà zunt pitschen na ston ellas betg mo resguardar ils giavischs spezials da la clientella, mabain era savair far diever bain da l'avantatg da las fabricaziuns unicas e serias pitschnas.
Ulteriuras infurmaziuns
Uniun per il taisser artisanal IGW/UTA
Secretariat
Unterzelgweg 4
3672 Aeschlen b. Oberdiessbach
Tel: +41 77 482 03 99
URL: www.textilforum.ch
Scola Industriala Val Müstair
7536 Sta. Maria VM
Tel: + 41 81 858 55 35
Centro scolastico per le industrie artistiche CSIA
Casella postale
6904 Lugano
URL: www.csia.ch