Lavurs
Practicists e practicistas da construcziun sustegnan in team sin plazzals da construcziun auta e bassa. Ensemen cun ils miradurs endrizzan els il plazzal, disfan bajetgs vegls e demonteschan implants. Els badiglian foss per la chanalisaziun e construeschan tavlegiadas or da lain per las lavurs da betunar.
Practicists da construcziun erigian er miraglias da quadrels: cun ina palutta stritgan els la maulta sin ils quadrels, mettan ils quadrels sin il mir e train giu la maulta restanta cun la palutta. Cun ina corda da mesirar ed in livel controlleschan els ch’il mir stettia en lingia guliva.
Pala, zappun e martè da miradur èn ulteriurs guaffens ch’ils practicists da construcziun dovran di per di. Suenter che la lavur è terminada nettegian els quels utensils e schubregian las maschinas da construcziun.
Mintgatant ston practicists da construcziun AFP leger simpels plans. Els deduceschan da quels las indicaziuns necessarias per lur lavur.
Practicists da construcziun èn conresponsabels ch’i saja urden sin il plazzal, ch’el saja net e segir. Els gidan a montar puntanadas u segirtads da crudar.
En il mintgadi da lavur resguardan practicists da construcziun reglaments che han da far cun prescripziuns da segirezza da la lavur e da protecziun da l’ambient. Els respectan ils ristgs sin lur plazzal e sa protegian cun chapellina, protecziun da l'udida, mascra da pulvra ed egliers da protecziun. Els eviteschan da tschufragnar l’ambient cun deponer e dismetter ils ruments a moda correcta.
Scolaziun
Basa legala
Ordinaziun federala 14-9-2010 (stan ils 1-9-2014)
Durada
2 onns
Furmaziun en la pratica
En ina interpresa da construcziun
Furmaziun en scola
1 di per emna a la scola professiunala
Roms professiunals
- basa da realisaziun
- realisaziun
- surveglianza da l’incumbensa
Curs ordaifer il manaschi
Tar la tematica basa da realisaziun, realisaziun (lavurs da miradur, construcziun da betun preparà al lieu) e surveglianza da l’incumbensa
Diplom
Attestat federal professiunal "practicist / practicista da construcziun AFP"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- imaginaziun dal spazi
- sanadad robusta
- esser fit
- avair nagina tema d’autezza
- resistent a l‘aura
- abilitad da lavurar en ina gruppa
Furmaziun supplementara
Curs
purschidas da scolas spezialisadas e professiunalas sco er da la Societad Svizra dals Impressaris-Constructurs
Miradur / Miradura AFQ
Practicists da construcziun AFP pon far la furmaziun scursanida sco miradur / miradura AFQ (entrada en il 2. onn da scolaziun). Silsuenter han els las medemas pussaivladads da furmaziun supplementara sco miradurs / miraduras AFQ.
Cundiziuns da lavur
Practicists da construcziun lavuran en interpresas da construcziun. I dat manaschis pitschens fin manaschis gronds cun dapli che 100 collavuraturs.
Mintga pèr dis midan els plazzal. Els lavuran adina en in team sut tschiel avert e da tutt’aura.
Tut tenor stagiun variescha il temp da lavur. La stad èn ils dis da lavur per regla pli lungs.
Ulteriuras infurmaziuns
Schweiz. Baumeisterverband SBV
Grundbildung
Weinbergstr. 49
Postfach
8042 Zürich
Tel: 044 258 83 38
URL: www.bauberufe.ch