Zum Titel springen

Ferrer / Ferrera d’armas AFQ

Furmaziun professiunala da basa

Lavurs

Ferrers e ferreras d’armas produceschan, reparan, fan adattaziuns, tgiran e vendan armas da fieu. Ozendi mainan els cunzunt manaschis che s’occupan cun la vendita e la reparatura da differentas sorts da buis e  pistolas. Lur clientella èn chatschadurs, sportists da prestaziun, tiradurs d’uniuns e collecturs.

Els exequeschan suandantas lavurs:

Fabricaziun e midada dad armas
  • preparar differents tocs da lain u da metal, p.ex. la channa, la serradira, il paratgiet, il lain u moni da la buis per montar las armas u tocca da las armas
  • montar differenta tocca dad in’arma cun agid da maschinas dirigidas da computers
  • far midadas vid tocca singula tut tenor giavisch da la clientella, p.ex. in dubel paratgiet, magazins u perspectivs
  • construir inizialas embellidas sin plachettas da metal, uschenumnadas plachettas da monogram u far e montar magazins integrads en il moni
Mantegnair e controllar las armas
  • controllar sistematicamain la funcziunalitad da las armas e resguardar strictamain las normas vertentas
  • controllar la singula tocca ed identifitgar ils mancos
  • tgirar las armas cun las nettegiar ed unscher cun ieli, far las controllas da finiziun, rechargiar cun muniziun e far l’agiustament final
  • tractar tocca veglia a moda speziala per ch’ella vesia puspè or nova
  • curreger mancos e fenomens d’isada, demontar e remplazzar tocca defecta
Commerzi e vendita
  • vender armas, muniziun, accessoris sco perspectivs, tastgas da buis e vestgadira da chatscha
  • cussegliar la clientella tut tenor il diever da l’arma
  • interprender ils pass necessaris tar ils uffizis responsabels ed emplenir ils formulars correspundents
  • declerar a la clientella l’utilisaziun da l’arma ed infurmar davart las perscripziuns da segirezza
Administraziun
  • registrar empustaziuns
  • far offertas
  • tschentar quint
  • manar la contabilitad
  • controllar las reservas dal deposit

Scolaziun

Durada

4 onns

Furmaziun en la pratica

En ina ferraria d’armas

Furmaziun en scola

1 - 1½ dis per emna a la scola professiunala, ensemen cun ils polimecanists AFQ
l’enconuschientscha dal rom vegn instruida a Lenzburg en furma da curs da bloc: mintgamai 6 – 8 dis en il 3. ed il 4. onn d’emprendissadi

Roms professiunals

Tractament professiunal da las armas, vendita e cussegliaziun da clientella, garantir la segirezza a la lavur, protecziun da la sanadad e da l’ambient, basa tecnica, englais tecnic, tecnica da materials e tecnica da furmaziun, tecnica da dissegn e da maschinas, electrotecnica e tecnica da regulaziun, projects interdisciplinars

Curs ordaifer il manaschi

Emprender ed exercitar la basa professiunala a moda pratica, 34 dis durant 4 onns

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Ferrer / Ferrera d’armas AFQ

Premissas

Furmaziun preliminara
  • Temp da scola obligatoric terminà
  • Emprendissadi scursanì: Cun polimecanist/a AFQ dura la scolaziun sco emprendist/a en dus onns.
Pretensiuns
  • enclegientscha tecnica
  • dun manual
  • moda da lavurar exacta
  • mauns inschignaivels e ruassaivels
  • grond senn da responsabladad

Furmaziun supplementara

Curs

purschidas da scolas professiunalas e scolas spezialisadas, da l’Associaziun svizra dals ferrers e dals commerziants dad armas sco era da producents dad armas

Examen professiunal (EP)

Spezialista da process cun certificat professiunal federal

Examen professiunal superiur (EPS)

Manadra da producziun dipl.

Scola spezialisada superiura (SSS)

p.ex. tecnicist diplomà SSS construcziun da metal

Scola auta spezialisada (SAS)

studis en direcziuns parentadas,  p.ex. Bachelor of Science (SAS) en microtecnica u en tecnica da maschinas. Tut tenor scola auta spezialisada valan differentas cundiziuns d’admissiun

Cundiziuns da lavur

La pli part da las ferreras e dals ferrers d’armas vendan armas fabritgadas industrialmain perquai che la producziun a maun è fitg limitada. Els lavuran savens en in lavuratori, stattan dentant er en contact direct cun lur clientella ed han temps da lavur regulars.

Las perspectivas professiunalas per ferreras e ferrers d’armas èn limitadas. Mo paucs manaschis scoleschan emprendists. Uschè èsi grev da chattar ina plazza d’emprendissadi. I na è er betg simpel da chattar ina plazza suenter l’emprendissadi. La glieud da professiun chatta pel pli lavur en fabritgas industrialas d’armas en la Svizra tudestga, en l’exteriur u en in arsenal federal nua ch’ella controllescha e giustescha las armas.

Intgins avran lur atgna fatschenta e sa spezialiseschan sin la vendita da differentas sorts dad armas specificas; sin la restauraziun d’armas istoricas u sin la producziun da serias pitschnas. Savens amplifitgeschan els lur sortiment e vendan vestgadira da sajettar u da chatscha u artitgels da sport da cumbat. I è er pussaivel da daventar in represchentant d’in manaschi d’import dad armas.

Ulteriuras infurmaziuns

Schweiz. Büchsenmacher- und Waffenhändlerverband SBV
3400 Burgdorf
Tel: +41 34 422 12 20
URL: www.sbv-asa.ch




berufsberatung.ch