Zum Titel springen

Sculptur / Sculptura d’objects da lain AFQ

Sculpturas e sculpturs d’objects da lain creeschan figuras d’animals e d’umans sco er artitgels d’artisanadi or da lain ed entaglian ornaments ed inscripziuns. Lur professiun pretenda inschign manual ed abilitads creativas.

Lavurs

I n'è betg pussaivel d'attribuir cleramain la professiun da la sculptura e dal sculptur d’objects da lain al mastergn, a l’artisanadi u a l’art, cunquai ch’ils cunfins èn culants. L’idea, il material e la tecnica duain s’unir en la sculptura da lain ad in’ovra d’art.

Sculpturs d’objects da lain creeschan tocs singuls u serias pitschnas tenor las ideas ed ils giavischs da la clientella. Els fan skizzas, dissegns e models e valiteschan quels cun ils incumbensaders. Per scrinarias decoreschan els mobiglias e per construiders d’orglas entaglian els ornaments per orglas da baselgia. Per incumbensa da baselgias produceschan els sutgas da chor e figuras religiusas e per cularias produceschan els models da cular. Per uniuns entaglian els premis ambulants e per persunas privatas vopnas da famiglia, sculpturas u monuments da fossa.

Cun la resgia a bindel e cun la resgia a motor resgian sculpturs d’objects da lain la furma groppa, il rest è lavur a maun. Els tendan il lain e preparan ils utensils. Cun il mogn, in martè da lain cilindric, pitgan els sin il moni dal stgalper. Cun mintga pass da lavur vegnan las conturas pli cleras ed ils fiers da sculptura utilisads pli fins. Cun forza e tuttina cun bler sentiment stauschan els cun la balla dal maun cunter il fier d’entagliar e taglian uschia davent stalizza per stalizza, enfin ch’els han la furma e l’effect giavischà. Els controlleschan cun il circul e cun egl versà la grondezza, la furma e las proporziuns dals entagls sco era l’effect da glisch e sumbriva. Tut tenor lavur tractan els a la fin la surfatscha cun empizzida, lac, colur, ieli u tschaira.

In champ da lavur spezial è la restauraziun. Sculpturs d’objects da lain restaureschan per exempel altars e figuras religiusas en baselgias ed auters entagls antics. Intgins sculpturs d’objects da lain sa spezialiseschan sin la producziun d’artitgels da souvenir.

Tar lur utensils da lavur tutgan sper ils utensils da scrinari usitads er il mogn u il splunter, ina gronda elecziun da stgalpers plats e radunds, cuntels d’entagliar, raspas da lain, glimas, raspas e palpiri da vaider per glimar lur stgalpers. Las maschinas ch'els dovran èn per regla ina resgia a bindel, ina maschina cumbinada per l’elavuraziun da lain, ina maschina da furar ed in indriz da sprizzar si lac.

Scolaziun

Basa legala

Ordinaziun federala 5-12-2008 (stadi dal 1-1-2018)

Durada

4 onns

Furmaziun en la pratica

En in atelier da sculptura u a la Scola da sculptura da lain a Brienz (BE)

Furmaziun en scola

A la Scola da sculptura da lain a Brienz (4 blocs a ca. 2 ½ emnas l'onn d’emprendissadi)

Roms professiunals

  • incumbensa: contact cun la clientella ed accumpagnament, materials da fabricaziun, AVOR, elements creativs
  • administraziun: calculaziun, marketing, documentaziuns
  • fabricaziun: istorgia, utensils a maun, preparaziun da materials, schablonas / furmas, colliaziuns, maschinas, reparaturas / restauraziuns, tractaments da la surfatscha, fundaments professiunals, modellar / cular, entagliar, lavurar cun auters materials, montascha / furniziuns
  • Curs ordaifer il manaschi

    Davart differents temas

    Maturitad professiunala

    La furmaziun pratica pretenda bler temp. Igl è perquai mo en cas excepziunals pussaivel da frequentar la scola da maturitad professiunala durant l’emprendissadi.

    Diplom

    Attestat federal da qualificaziun "sculptur / sculptura d’objects da lain AFQ"

Premissas

Furmaziun preliminara
  • scola populara terminada cun pretensius mediocras u autas
  • bunas prestaziuns en dissegn
  • examen d’admissiun a la Scola da sculptura da lain a Brienz (dis da fufragnadi èn obligatorics per la participaziun a l'examen)
Pretensiuns
  • sentiment per l'art applitgà, furmas e proporziuns
  • inschign manual
  • talent da dissegn
  • bun dun d’observaziun
  • imaginaziun dal spazi
  • senn per lavurs nettas ed exactas
  • buna constituziun corporala
  • pazienza e perseveranza
  • autonomia

Furmaziun supplementara

Curs

purschidas da la Scola da sculptura da lain a Brienz sco era da scolas d'art applitgà

Examen professiunal (EP)

maister sculptur / maistra sculptura da lain

Scola spezialisada superiura (SSS)

curs da furmaziun en secturs spezials parentads, p.ex. creader / creadra SSS art figurativ u creader / creadra design da products SSS

Scola auta spezialisada (SAS)

studi en direcziuns spezialas parentadas, p.ex. Bachelor/Master of Arts (SAS) en conservaziun-restauraziun

Cundiziuns da lavur

Sculpturs d’objects da lain mainan per il solit in agen atelier. Persunas professiunalas talentadas cun blera perseveranza han bunas perspectivas da pudair viver da lur professiun. Ina segunda professiun è d’avantatg.

En Svizra datti var 30 plazzas d’emprendissadi; var dus terzs a la Scola da sculptura da lain a Brienz. Las ulteriuras plazzas d’emprendissadi chatt’ins en l’entira Svizra, surtut en la Part Sura Bernaisa.

Ulteriuras infurmaziuns

Associaziun svizra da sculptura da lain
3855 Brienz BE
URL: www.holzbildhauerverband.ch

Scola da sculptura da lain
Schleegasse 1
3855 Brienz BE
Tel: +41 33 952 17 51
URL: www.holzbildhauerei.ch

Cuminanza d'interess artisanadi da lain IGKH
3855 Brienz BE
Tel: +41 79 853 88 99
URL: www.kunsthandwerk-holz.ch

Revistas professiunalas:
"Schnitzpunkt"



berufsberatung.ch